Умумий ўртатаълим мактаб амалиётчи психологлари малакасини ошириш курсининг мутахасисслик буйича давлат талаблари, ЎҚув-мавзу режа, дастур

Машқ усули ҳақида тушунча.
Машқ усули - тренинг жараёнида иштирокчиларни фаоллаштириш, кайфиятини кўтариш, улар орасида ўзаро ишонч ва самимийлик муҳитини яратиш мақсадида психогимнастик машқлар усулини қўллаш тактикасидир.
Машқ усули - зарур малака ва кўникма ҳосил қилиш ҳамда уларни мустаҳкамлаш учун назарий, амалий билимларни онгли равишда, кўп марталаб такрорлашдан иборат.
Бу усулнинг вазифаси - олинган билимлардан кўникма ва малакаларни шакллантиришдир.
Шунингдек, машқлар тренинг давомида олинган маълумотларни иштирокчилар қандай ўзлаштираётганлигини ҳам кўрсатиб бера олади. Тренердан талаб қилинадиган хусусиятлар, яъни машқни танлашда тренер нималарни инобатга олиши зарурлиги ҳақида гaп кетганда қуйидагиларни таъкидлаб ўтиши мақсадга мувофиқдир:
- биринчи навбатда машқни ўтказиш натижасида гуруҳда қандай ҳолат вужудга келишини ҳисобга олиши лозим. Бунда асосан 2 хил ҳолат кузатилади:
а) бутун гуруҳнинг ҳолати ўзгаради;
б) гуруҳдаги ҳар бир иштирокчининг ҳолати ўзгаради;
- иккинчи навбатда тренер гуруҳ тараққиётининг қайси босқичида турганлигини ҳисобга олиши керак. Буни билишнинг зарурияти шундаки, гуруҳ иштирокчилари қанчалик жипслашган бўлса, ўзини эркин сезса, ўтказилаётган машқлар таҳликасиз ўтади. Айниқса гуруҳ аъзоларининг тана контактларига оид бўлган ва кўзни юмиб бажариладиган машқларга эътибор қаратиш керак, чунки бундай машқларнинг бевақт ўтказилиши гуруҳда зўриқиш ёки норозилик ҳолатларини келтириб чиқариши мумкин.
- учинчи навбатда кун вақтини ҳисобга олиш керак бўлади, чунки кун бошланишида гуруҳда ишчанлик, аҳиллик, ўзаро ишонч муҳитини яратувчи машқларни ўтказиш мақсадга мувофиқдир. Бу - гуруҳнинг айни пайтдаги ишга тааллуқли бўлмаган ташвиш ва муаммоларини унутишига олиб келади, гуруҳ аъзолари “ҳозир ва шу ерда” деган қоидага амал қилишади. Бундан ташқари, бутун диққат-эътиборини ва ақлий фаолиятини сафарбар этишига имкон туғилади. Куннинг иккинчи ярмида эса чарчоқни тарқатадиган, ҳаяжонли ҳис-туйғуларни юмшатишга олиб келадиган машқларни ўтказиш тавсия этилади.