Ulıwma orta bilim beriw mektepleriniń 7-klası ushın sabaqlıq

13. 5326-sanlı párman menen 846-sanlı qarardıń bir-birinen ózgeshelik 
hám uqsaslıqların aytıń.
2021-jıl dawamında Moynaq rayonındaǵı «Hákim ata» (Sulayman Baqırǵaniy) 
zıyarat ornına 881,0 mln sum muǵdarında qarjı ajıratılıp, qayta ońlaw hám átirapın 
abadanlastırıw jumısları alıp barıldı. 
14. «Hákim ata» zıyarat ornı ushın ne maqsette qarjı ajıratılıp qayta 
ońlaw isleri alıp barılǵan? 
Qaraqalpaqstan Respublikasında 2021-jıl dawamında «Qoy qırılǵan qala», 
«Topıraqqala», «Ayazqala», «Shılpıq», «Gáwirqala», «Qızılqala», «Pilqala», 
«Iyshanqala», «Jambasqala» arxeologiyalıq estelikleri, «Sultan Wayis baba», «Shayx-
Jalil baba» zıyarat orınlarında abadanlastırıw jumısları alıp barıldı. 
15. Bul abzactaǵı menshikli atlıqlar qaysı gáp aǵzasınıń xızmetin atqarıp 
kelgen?
16. Siz mámleketimizde turizmdi rawajlandırıw ushın jáne neler islewge 
boladı dep oylaysız?

---

171
IX BÓLIM. KÓRKEM ÓNER HÁM MÁDENIYAT
Tapsırma 1.1.
 
Tekstti túsinip oqıń. 
Memuar – francuz tilinen alınǵan bolıp, bizińshe «estelik» «yadnama» degendi 
bildiredi. Ondaǵı tiykarǵı nárse, avtor bolǵan waqıyalardıń qatnasıwshısı 
yamasa gúwası sıpatında waqıyalardıń orayında turadı. Onıń tariyxshıdan, ilimpazdan 
ayırmashılıǵı real waqıyanıń ózi qatnasqan yamasa kórgen bólimin kórkem 
sáwlelendiredi. Memuar qálegen tarawdaǵı adam tárepinen jazılıwı múmkin.
Memuarlıq shıǵarmada waqıyalar birinshi betten bayan etiledi. Ondaǵı waqıyalar 
siyasiy xronika hám biografiyalıq hám ilimiy áhmiyetke iye materiallar menen 
baylanısıp ketedi. Memuardıń tariyxıy hújjet sıpatında bahası olardaǵı waqıyalardıń 
áhmiyeti, bayanlawdıń izbe-izligi hám anıqlıǵı menen belgilenedi. Memuar etnografiya 
ushın da áhmiyetli dárek bolıp esaplanadı. Memuarlıq shıǵarmanı tek jazıwshılar emes, 
tariyxshılar, kórkem-óner hám jámiyetlik ǵayratkerler, ilimpazlar yamasa qálegen 
basqa tarawdaǵı adam dóretiwi múmkin. Bunday shıǵarmalarda kórkemlik, tariyxıylıq, 
hújjetlilik qásiyetiniń basım bolıwı, onıń túrli taraw wákilleri tárepinen dóretiliwi 
menen baylanıslı. Ondaǵı súwretlenetuǵın waqıyalar mazmunınıń áhmiyeti de memuar 
avtorınıń kásiplik ómir jolı, jámiyette atqarǵan xızmet wazıypası hám memuarlardıń 
jazılıw maqsetinen ǵárezli boladı.