Transport vazirligi toshkent davlat transport universiteti

Bitiruv malakaviy ishi mavzusining dolzarbligi. Korxonada xodimlarni rag’batlantirish mehnat samaradorligini oshirishning asosiy omillaridan hisoblanadi. Xodimlarni rag’batlantirishning turli xil yo’llari mavjud bo’lib, raxbar ularni o’z o’rnida va to’g’ri qo’llay bilsagina natija va samaraga erishadi, aks holda bunday harakatlar korxona boshqaruv tizimida kutilmagan holatlarga va oqibatlarga olib kelishi mumkin.
Rag’batlantirish shakllari moddiy va nomoddiy ko’rinishlarda amalga oshiriladi va uning natijasida xodim va korxona maqsadlarini uyg’unlashtirish, xodimlarning jonbozlik ko’rsatib faoliyat olib borishlariga va boshqa bir qancha ijobiy yutuqlarga erishiladi.
Korxonalarda rag’batlantirish omilidan faol foydalanib kelinadi. Ma’lumki, korxona tarkibida turlicha shaxsiy va kasbiy xususiyatga ega xodimlarlar mehnat faoliyatini olib borishadi. Mazkur individlar o’rtasidagi har doim yuzaga kelib turuvchi turlicha ziddiyatlarni bartaraf etib borish, ularni uyg’unlikda faoliyat ko’rsatishga undaydigan muhitni yaratish korxonalardagi asosiy vazifalardan hisoblanadi. Shu maqsadda, korxona samaradorligini oshirishda ijobiy natija beruvchi rag’batlantirish masalalari bugungi kunda mamlakatimiz korxonalari faoliyatidagi muhim va dolzarb yo’nalishlardan hisoblanadi va mazkur jarayonlarni yanada jadallashtirishga qaratilgan tadqiqotlar muhim ahamiyat kasb etadi va ushbu holat mavzuni tanlashga muhim turtki bo’ldi deyish mumkin.
Muammoning o’rganilganlik darajasi. Xodimlarni rag’batlantirish omillari, ularni nazariy va amaliy jihatlari xorijlik va mamlakatimiz olimlari tomonidan jadal o’rganib kelinayotgan yo’nalishlardan biri hisoblanadi. Ushbu yo’nalishda tadqiqot olib borgan taniqli xorij olimlaridan D.Mak Gregor, A.Fayol, D.Atkinson, G.Xoll, K.Madsen, A.Maslou, X.Xekxauzen va boshqalarning fanning mazkur yo’nalishiga qo’shgan hissalarini ta’kidlash mumkin.
MDH mamlakatlari olimlari tomonidan ham menejment tizimida xodimlarni rag’batlantirish omillariga bag’ishlangan tadqiqotlar olib borishgan mutaxassislardan Ye.P.Ilin, D.N.Uznadze, P.V.Simonov, G.Atamanchuk, N.I. Shatalova, V.I.Kovalev va boshqalarni misol qilib keltirish mumkin.
Menejmentning turli jihatlarini, jumladan, rag’batlantirish omillarini o’rganishda o’z hissalarini qo’shgan mamlakatimiz olimlaridan Q.Abdurahmonov, Sh.Zaynutdinov, R.I.Nurimbetov, D.Rahimova, B.A.Abdukarimov, G’.M.Qosimov va boshqalarning asarlarini ta’kidlash muhim.