Тошкент вилояти чирчиқ давлат педагогика институти гуманитар фанлар факультети

ТАЛАБАЛАР ФАОЛИЯТИ НАТИЖАЛАРИНИ ҲИСОБГА ОЛИШ ВА БАҲОЛАШ

Талабаларнинг педагогик амалиёт давридаги фаолиятлари масъул шахслар томонидан назорат қилиб борилади. Педагогик амалиёт даврида талабаларнинг амалий фаолиятини назорат қилиш ва баҳолаш қуйидагича:

1. Талабалар фаолиятини рейтинг тизими бўйича баҳолаш:
- 5 баҳо - аъло;
- 4 баҳо - яхши;
- 3 баҳо - қониқарли;
- 2 баҳо - қониқарсиз.


2. Педагогик назорат шакллари:
- индивидуал ва гуруҳ билан суҳбатларни уюштириш;
- амалиётчи талабаларнинг ҳужжатларини изчил, доимий текшириб бориш;
- талабалар фаолиятининг ҳисобга олинишини таъминлаш;
- амалиётчи талабалар томонидан ташкил этилаётган дарсларни ва гуруҳдан, таълим муассасасидан ташқари маънавий-маърифий тадбирларни кузатиш.

Амалиётчи талабаларнинг педагогик фаолиятларини назорат қилиш ва баҳолаш қуйидагича амалга оширилади:

5 баҳо (аъло)
- талаба ўқувчилар билан мустақил ишлайди, зиммасидаги вазифаларни тўғри англайди, мақсадни аниқ қўя олади;
- жамоа аъзоларнинг ёш, индивидуал хусусиятларини, улар билан ташкил этиладиган педагогик фаолиятнинг ўзига хос жиҳатларини инобатга олиб, ўқув ва маънавий-маърифий ишларнинг шаклларини ташкил қилиш усулларини танлайди;
- ўқувчиларнинг ривожланганлик ва тарбияланганлик даражаларини ҳисобга олади;
- тарбиявий ишлар самарадорлигини таҳлил қилади;
- гуруҳ раҳбари сифатида ташкилотчилик қобилиятига, кенг дунёқарашга, бой тафаккурга, илғор иш тажрибалари, инновацион ғояларидан самарали фойдаланиш малакасига эга;
- фаолиятни ташкил этишда билишга оид, лойиҳалаш, ижодий-амалий, тадқиқотчилик, мулоқатга киришувчанлик, ташкилотчилик, изчилликни таъминлаш ва техник-технологик малакаларга эгаликни намоён этади.
4 баҳо (яхши)
- талаба айрим ҳолларда тарбиявий иш назарияси ва методикаси бўйича етарлича билимга эга эмаслигини, жамоа билан ташкил этиладиган тадбирларни уюштиришга тайёрланиш ва ўтказишда мустақил, ижодкор эканлиги суст намоён қилади;
- тарбиявий фаолият мақсадларини аниқлашда, тарбия методларини танлашда кичик хатоларга йўл қўяди, мураккаб педагогик вазиятларда тўғри қарор қабул қилишда маълум қийинчиликларга дуч келади;
- фаолиятни ташкил этишда билишга оид лойиҳалаш, ижодий-амалий, тадқиқотчилик, мулоқотга киришувчанлик, ташкилотчилик, изчилликни таъминлаш ва техник-технологик малакаларга эгаликни намоён этишга ҳаракат қилса-да, бироқ, маълум қийинчиликларга дуч келади.