Toshkent tibbiyot akademiyasi tibbiy pedagogika fakulteti

Mavzuning dolzarbligi: Pedagogika shaxsni shakllantirishga yo‘naltirilgan muayyan tizimli faoliyat, shuningdek, ta’lim-tarbiya mazmuni, umumiy qonuniyatlari, shakli va metodlari haqidagi fan. Pedagogika ijtimoiy fanlar tizimiga kiruvchi fan sanalib, yosh avlod hamda kattalarni milliy istiqlol g‘oyalari asosida tarbiyalash, unga ta’lim berish muammolarini o‘rganadi.

Pedagogika fani shaxsni rivojlantirishning ikki muhim jihati – uni o‘qitish va tarbiyalashga asosiy e’tiborni karatganligi bois ta’lim nazariyasi (didaktika) va tarbiya nazariyasi fanning muhim tarkibiy qismlari hisoblanadi.

“Pedagogika” fani bo‘lg‘usi kasbiy faoliyati pedagogik madaniyat va layoqatni taqozo qiladigan talabalar uchun ishlab chiqilgan. Pedagogik bilimlar talabalarda o‘quv va kasbiy faoliyatni muvaffaqiyatli egallash hamda amalga oshirish omili sifatida insonning shaxsiy xususiyatlari haqidagi yaxlit tasavvurni shakllantirishga, o‘qish, aqliy mehnat madaniyati va mustaqil o‘qib bilim orttirish ko‘nikmalarini rivojlantirishga yordam beradi hamda inson va jamiyatning pedagogik tabiatini bilishga tayangan holda samarali qarorlar qabul qilishga imkon tug‘diradi.