Toshkent farmatsevtika instituti tillar kafedrasi magistratura talabalari uchun

Matn asosida so‘zning sehri haqida nimalar deysiz?
Matndagi birinchi va ikkinchi gaplarda muallif nimalar demoqchi bo‘lganini ayting.
Har qanday odamni o‘zingizga qaratishda, turmu-shingizni qayta yaratishda, atrofga ma’ni va go‘zallik nurlarini taratishda so‘zga teng keladigan boshqa qurol yo’q! Siz o‘zingizdan avval so‘zingizni asrang: u- gavhar, tejab ayting, har bir so‘zingiz bir uzukka ko‘z bo‘lsin!
So‘zni chaynamang, ming‘irlamang, har bir harfni o‘z ohangi, rangi bilan tiniq talaffuz qiling! Quvonchli so‘zni quvonch bilan ayting! Xafa so‘zni hasrat bilan ayting! “Urg‘u” degan oltin tayoqcha bor, kerak so‘zni topib tegizsangiz, jumla jaranglab ketadi! Bu degani gapingiz albatta tinglovchining yuragiga yetadi!
Mustaqil ishlari uchun material.
Matnni notiqlik mahorati va san’atini oshirishga ta’siri jihatidan tahlil qiling.
Inson yuragi ham bir olam. Uning ham bahor va kuzlari, tong va tunlari, orom va zilzilalari bor. She’riyat yurak sadosi bo‘lganidan ana shu murakkab tuyg‘ular olamini ifoda qiladi. Shuning uchun ham bir she’rni o‘qib quvonsak, ko‘ksimiz surur va iftixor tuyg‘ulariga to‘lsa, ikkinchi bir she’rni o‘qib hayolga tushamiz, inson dardlariga oshno bo‘lamiz. Shoirlik o‘sha tuyg‘ularning tabiiyligi va haqiqiyligiga she’rxonni ishontira olishdir.( Erkin Vohidov. Shoiru she’ru shuur. Adabiy o‘ylar).


Nazorat uchun savollar:
1. Nutq madaniyati kursining maqsad va vazifalari, o‘rganish obekti haqida nimalarni bilasiz, kursning dolzarbligi nimada?
2. Nutq madaniyatiga dunyo miqyosida qanday e’tibor berilmoqda?
3. Nutq madaniyatining asosiy mezonlari haqida gapirib bering.
4. Nutq madaniyatining boshqa fanlar bilan aloqasi haqida nimalarni bilasiz?
5. Nutq madaniyatiga bog‘liq qanday yirik asarlarni bilasiz?
6. O‘zbekiston Respublikasi Prezidenti asarlarida til va nutq madaniyatiga qanday e’tibor qaratilmoqda?
7. Nutq madaniyatiga oid qanday asosiy adabiyotlarni bilasiz?