Toshkent davlat yuridik universiteti jinoyat huquqi

 
 
8.4. Jinoyatning maxsus subyekti
 
Jinoyatning maxsus subyekti deganda qonunda belgilangan yoshga yetgan, 
aqli raso jismoniy shaxs belgilari bilan birga Jinoyat kodeksining Maxsus qismida 
yoki boshqa normativ-huquqiy hujjatlarda belgilangan yana qo‗shimcha maxsus 
belgiga ega bo‗lgan shaxs tushuniladi.
Jinoyat maxsus subyektining belgilari jinoyat tarkibi doirasiga kiruvchi 
subyektning zaruriy belgisi hisoblanadi va qilmishni JKning muayyan normasi 
bilan to‗g‗ri kvalifikatsiya qilishda muhim ahamiyat kasb etadi. Masalan, davlat 
ro‗yxatidan o‗tgan tadbirkorlik subyekti tomonidan savdo yoki xizmat ko‗rsatish 
qoidalarini juda ko‗p miqdordagi qiymatda buzilishi JK 189-moddasi bilan 
kvalifikatsiya qilinsa, tadbirkorlik subyekti sifatida davlat ro‗yxatidan o‗tmasdan 
shaxs tomonidan savdo yoki xizmat ko‗rsatish qoidalarining juda ko‗p miqdordagi 
qiymatda buzilishi JKning 188-moddasi ya‘ni, noqonuniy tadbirkorlik bilan 
kvalifikatsiya qilinadi. Demak, shaxsni JK 189-modda bilan jinoiy javobgarlikka 
tortishda aybdor, albatta, davlat ro‗yxatidan o‗tgan xo‗jalik yurituvchi subyekt 
bo‗lishi lozim.