Тошкент Давлат техника

Fizik-kimyoviy usulda detallarni tozalash oqim yordamida va vannalarda olib boriladi. Detal sirtidagi iflosliklar muayyan sharoitda turli xildagi preparatlarning suvdagi eritmasi yoki maxsus erituvchilar bilan tozalanadi. Bularga kimyoviy eritmaning yuqori (75-95 °S) temperaturasi, sezilarli darajadagi bosimga ega bo‘lgan tebranuvchi oqimning mavjudligi, samarali yuvuvchi vositalarning qo‘llanilishi kiradi.
Elektr-kimyoviy usulda tok o‘tkazuvchi elektrolitdan foydalaniladi. Tozalash o‘zgrmas va o‘zgaruvchan tokda olib boriladi. Ushbu jarayonda ko‘p hollarda zichligi 3-10 A/dm² ga ega bo‘lgan tokdan foydalaniladi. Yog‘sizlantirish jarayonining muddati ortib borishi bilan tozalangan detalning faolligi ortib boradi. Elektrokimyoviy tozalash detallarni galvanik, polimer va lok-bo‘yoq materiallari bilan qoplashda ham keng qo‘llaniladi.
Ultratovush usuli tozalanadigan sirtga suyuq muhit orqali energiyani uzatishga asoslangan. 20-25 kGs tebranish chastotasida katta tezlanish hosil bo‘lib, ushbu holat suyuq muhitda mayda ko‘piklar hosil bo‘lishiga olib keladi. Ular yorilganda mikrohajimda katta kuchga ega bo‘lgan gidravlik zarbalar paydo bo‘ladi. Natijada uglerodli yopishmalarni 2-3 minut, moylik pardalarni 30-40 s davomida buzilishi sodir bo‘ladi. Ultratovush usuli murakkab shaklga ega bo‘lgan (karbyurator, yonilg‘i nasoslari va elektr jihozlari) detallarni tozalashda qo‘llaniladi.
Termik usuldan eng barqaror bo‘lgan uglerodli yopishmalar (qurum, asfalten va b.) dan tozalashda foydalaniladi. Buning uchun detal termik pechga joylashtirilib, unda 600-700 ºS da 2-3 soat davomida ushlab turiladi, undan so‘ng pech bilan birgalikda sovitiladi. Detallardagi qurum gaz alangasida kuydirib bartaraf etiladi.
Mexanik usulda detal qo‘lda tirnagichlar, shchetkalar va b. bilan tozalanadi. Bu maqsadda maydalangan meva po‘choqlarini, abraziv zarrachalarni va boshqa materiallarni ifloslangan sirtga havo, suv yoki yuvuvchi eritmani uzatuvchi uskunalardan foydalaniladi.