Тошкент Давлат техника

4.3. Мойлаш ва совитиш тизимларини ростлаш
ва таъмирлаш
Мой насосини текшириш. Шестерняли мой насоси мойни етарли миқдорда узатмаслиги, мой йиққич тўрини ифлосланиши ёки сақлагич клапанининг қониқарсиз ишлаши натижасида содир бўлиши мумкин.
Мой насоси стендда, етакловчи шестернянинг 1410±20 айл/мин айланишлар частотасида синалади. Зарур бўлган қарама-қарши босим сўрувчи трубкадаги вентилни ёпиш йўли билан ҳосил қилинади. Ушбу босим 0,6 МПа атрофида бўлиши лозим. Синаш 70% дизел мойи ва 30% керосин аралашмасида олиб борилади. Аралашманинг қовушқоқлиги 20-21ССт бўлиши лозим. Синаладиган насоснинг иш унуми 50 л/мин дан паст бўлмаслиги лозим, бунда сақлагич клапанлари 0,65 – 0,75 МПа босимда очилади.
Мой филтрини ростлаш, мой филтрининг корпуси бош магистралда ва доимий ишчи босимни ушлаб турувчи чиқишдаги мой оқимига параллел ўрнатилган тўкиш клапанини текшириш ва ростлашдан иборат.
Сақлаш клапани машинани ишлаб чиқувчи корхона томонидан босимнинг 0,3- 0,4 МПа гача пасайишига ростланган. Уларни қисмларга ажратиш ва ростлаш фақат ихтисослашган устахоналарда амалга оширилиши мумкин.
Мойнинг ҳарорати 70-80°С дан паст бўлганда мой радиаторини мойлаш тизимидан автоматик равишда ажратувчи клапан термостат 0,05-0,07 МПа босимга ростланган. У двигателда ҳам ростланмайди.
Двигателдаги чўкиш клапанини ростлаш учун, двигателдаги температура 80°С паст бўлмаган ҳароратгача қиздирилади. Ростлаш тирсакли валнинг максимал айланишлар частотасида олиб борилади. Унда тўкувчи клапаннинг ростловчи винти очилишига ёки ёпилишига буралиб, мойнинг босими 0,3-0,35 МПа чегарага келтирилади, бунда двигател совуқ мойда юргизишдаги босим 0,4 МПа дан юқорига кўтарилмасин.
Дағал тозалаш филтрининг филтрловчи элементлари 220-250 соатдан сўнг текширилади. Уларнинг ифлосланганлик даражаси секцияни дизел ёнилғиси билан тўлдириш вақти билан аниқланади. Бунинг учун ташқи чўкмалардан тозаланган секцияни вертикал ҳолатда дизел ёнилғисига чўктирилади. Секциянинг бўғизи аввалдан резина ёки ёғоч тиқин билан бекитиб қўйилади. Агар секцияни тўлиш вақти 40 сек дан ортиқ бўлса, уни юқори босимли ёнилғи оқимида ювиш керак.