Tmg25: Zentralwelle, Hohlradwelle

Fanga kirish.

Masalan: Dastgohning sifatini baholash uchun nafaqat uning aniqlik, quvvat, unumdorlik va hokazo ko‘rsatkichlarini, balki bu ko‘rsatkichlarni ish jarayonida iloji boricha ko‘proq vaqt mobaynida saqlay olishini ham bilish kerak bo‘ladi.
Albatta puxta mashina sifatli degani emas, mashina puxta bo‘lishi, ammo uning texnikaviy ko‘rsatkichlari past bo‘lishi mumkin. Mashina yetarli darajada puxtalikka ega bo‘lmasa, uning barcha texnikaviy ko‘rsatkichlari qanchalik yuqori bo‘lmasin o‘z ahamiyatini yo‘qotadi, chunki ulardan ish jarayonida to‘la foydalanib bo‘lmaydi.
Ma’lumki, yer qa’ridagi ma’danlarning tabiiy zaxiralari cheklangan, mashinasozlikda esa nisbatan ko‘p metall ishlatiladi. Shu sababli, yangi yaratiladigan mashinalar metall sarfini va tannarxini kamaytirish, ayni chog‘da ularning quvvatini oshirish puxtalik ko‘rsatkichlarini baholashni talab qiladi.
Mashinalar puxtaligi vaqtga bog‘liq. Detallar yeyilib borgani sari ularning puxtaligi kamayib boradi. Barcha buyumlar, shu jumladan, mashinalar ham ertami – kechmi buziladi. Mashinalar puxtaligi nazariyasi mashina ishlash qobiliyatini asta – sekin yo‘qotish hodisasi haqidagi fandir. U ishlamay qolishlar qonuniyatlari va kelib chiqish sabablarini, shuningdek mashina puxtaligini oshirish vositalarini ko‘rib chiqadi.
Puxtalik masalalarining maxsus xususiyati vaqt omili hisoblanadi, chunki boshlang’ich parametrlarning mashinadan foydalanish jarayonida o‘zgarishi baholanadi, uning chiqish parametrlarini saqlanishi nuqtai nazaridan ob’yekt o‘zini qanday tutishi oldidan aniqlanadi. Puxtalik haqidagi fan mashina chiqish parametrlarini (ularning aniqligi, quvvati, foydali ish koeffitsienti, unumdorligi) belgilangan darajaga yetkazish bilan shug‘ullanmaydi, bu boshqa fanlarning vazifasidir. Puxtalik fani bu ko‘rsatkichlarning vaqt o‘tishi bilan o‘zgarishini o‘rganadi.
Dastlab buyumlarning puxtaligi haqidagi bilimlar faqat tajribaga asoslangan bo‘lib, hunarning sirlari tariqasida avloddan avlodga o‘tib kelgan. Mustahkamlik haqidagi fan XIX asrda jadal rivojlandi, chunki bu davrda mashina va qurilmalar yaratish ommaviy tus oldi.