Tizimlar va signallarni qayta ishlash

Impuls-kodli modulyasiya ingl: pulse-code modulation (PCM) rus: импульсно-кодовая модуляция
Modulyasiya usuli, unga ko‘ra, analog signal qat’iy uzunlikdagi ketma-ket uzatiladigan n-razryadli (odatda n=8), kodli so‘zlardan iborat raqamli ma’lumotlar oqimiga aylantiriladi. Tovushni uzatish 64Kbit/c tezlik hamda kompanderlash bilan amalga oshiriladi. Impuls-kodli modulyasiya yordamida o‘zgartirilgan tovush signalining sifati yuqori bo‘ladi.
Kanal ingl: channel rus: канал	Signal yoki ma’lumotlar uzatish vositasi yoki yo‘li. Signallarni uzatish vositasi fizik kanal deb ataladi. Ma’lumotlar manbadan uni qabul qiluvchiga uzatiladigan yo‘lni mantiqiy kanal aniqlab beradi. Kanallarning ikki klassni farqlashadi: asinxron va sinxron. Sinxron kanalda amalga oshirilayotgan uzatish jarayonini sinxronlashtirish ta’minlangan bo‘ladi. Asinxron kanal shu bilan ajralib turadiki, u orqali ma’lumotlar uzatishda jo‘natuvchi va qabul qiluvchi ishlari sinxronlashtirilmaydi. Uzatilayotgan signallarning shakliga qarab kanallar analog va diskret turlarga bo‘linadi. Signallarni uzatish usuliga qarab kanallar bir necha turlarga bo‘linadi – simpleks, yarim dupleks, dupleks kanallar.
Keng polosali kanal ingl: broadband channel rus: широкополосный канал	Ma’lumotlarni tezkor uzatishni ta’minlovchi fizik kanal. Keng polosali kanallar koaksial kabellar, radiokanallar va optik kanallar asosida yaratiladi. Ular nisbatan qimmat bo‘lgani sababli, ma’lumotlarni yuqori tezlikda uzatish talab qilinmasa, tor polosali kanallar yoki polosa asosli kanallardan foydalaniladi.
Korrelyator ingl: сorrelator rus: коррелятор	Tasodifiy signallarning korrelyatsion funksiyasini hisoblash uchun mo‘ljallangan qurilma.
Kvantlagich ingl: guantizer rus: квантователь	Analog signalni raqamli signalga aylantirish uchun mo‘ljallangan qurilma. Kvantlagich diskret signalning qiymatlari kattaligini unga yaqin bo‘lgan diskret sathlardagi qiymatlari bilan almashtiradi.
Kvantlash ingl: quantization rus: квантование	1. Biror bir uzluksiz kattalik qiymatlari kengligini chekli bir-biri bilan kesishmaydigan oraliqlarga bo‘lish. 2. Ma’lumotlarni uzluksiz shakldan diskret shaklga o‘tkazish amali.