Til o’qitish mazmuni va materiallari

Til materiallari

Har bir til o’qitilishi tabiiy sharoitda moslashtirilgan holda olib borilishi maqsadga muvofiq. Chunki chet til tabbiy sharoitda muvaffaqiyatli o‘zlashtiriladi. Geografik jihatdan olisda joylashgan va til sohibi bilan muloqotda bo‘lish imkoniyati mavjud bo‘lmagan ta’lim sharoitidagi chet til o‘rganish jarayonida amaliy maqsadga erishish murakkablashadi. Aynan shu vaziyat chet til o‘quv predmetini o‘qitishda qator qiyinchiliklarga sabab bo‘ladi. Shu sababdan o‘quv jarayonini tabiiy muhitga yaqinlashtirish, darslarda tabiiy nutq vaziyatlarini yaratish yuzasidan izlanishlar olib borish muhim ahamiyat kasb etadi. Bu esa til o’qitish materiallaridan foydalanish ehtiyojini paydo qiladi.

Til o’qitish materiallarini shaklan va mazmun jihatidan uch asosiy turlarga ajratish mumkin:

• Ko’rgazmali materiallar. Bu turdagi materiallar til o’rganuvchining vizual qobiliyatlarini hisobga olgan holda ma’lum nutq ko’nikmalarini shakllantirishga xizmat qiladi. Ko’rgazmali vositalardan o’yin shaklida, rasmga qarab gap yo matn tuzish hamda diktantlar ko’rinishida foydalanish mumkin.
• Audiovizual materiallar. Ushbu materiallarga o’z nomi bilan aytganda ko’rish va eshitish uchun mo’ljallangan vositalar kiradi. Masalan, subtitrli videolar, kichik va katta hajmdagi filmlar, multfilmlar va karaoke tarzidagi musiqalar.
• Matnlar. Ko’rinishidan oddiy tuyuladigan bu turdagi materiallar aslida til o’rganuvchining og’zaki va yozma nutq ko’nikmasi hamda o’qib tushunish qobiliyatlarini rivojlantirishga yordam beradi.