Texnologiya ta’limi praktikumi fanidan o’quv uslubiy majmua

Dastgohda ishlash. Torets sirtga ishlov berganda ishchi arralanadigan materialni tirgak uchburchaklikka jips tekkizib turgan holda, yo’naltiruvchi chizg’ichga qadalguncha suradi (bunda material bilan birga uchburchaklik ham suriladi) va materialdan zagotovka kesib oladi. Kesilgan zagotovka bunkerga tashlanadi, arralanayotgan material esa tirgak uchburchaklik bilan birga dastlabki holatga qaytadi.
Bo’ylamasiga arralashda dastgoh bir marta sozlangancha eni turlicha bo’lgan zagotovkalar kesib olinadi. Bunda yo’naltiruvchi chizg’ich, enli qistirmalardan foydalanib, yenliroq zagotovkaning eniga moslab o’rnatiladi. Taxtadan kengligi har xil zagotovkalar kesib olishda bir yo’la bitta yoki ikkita qistirmadan foydalanish tavsiya etiladi.
Ish jarayonida yaroqsiz buyum chiqarishga yoi qo’ymaslik uchun kesib olinayotgan zagotovkalarning qo’yilgan talablarga mosligi vaqti-vaqti bilan tekshirib turiladi.
Zagotovka dastaki suriladigan S-6 dastgohida ishlaganda pona-pichoq, to’siqlar va zagotovkalarning dastgohdan chiqib ketishiga yo’l qo’ymaydigan tirgak(tirnoq)lar dastgohga o’rnatilgan bo’lishi shart. Pona-pichoqning qalinligi arra tishlarining ochilish kengligidan 0,5 mm ortiqroq bo’lishi, pichoqning arra tishlaridan uzoqligi esa 10 mm dan oshmasligi lozim. Pona-pichoq, disk arra sirtida siljitiladi va arra tishlariga dasta yoki maxovikcha yordamida yaqinlashtiriladi yoki ulardan uzoqlashtiriladi. Tirgaklar arraning har ikki tomoniga o’rnatiladi. Qisqa zagotovkalar qiyasiga arralanganda maxsus moslamadan foydalaniladi.
Arraning ustki qismini to’sib turuvchi to’siqlar avtomatik ravishda pastga tushib, arraning yog’ochga kirib turgan tishlarinigina ochiq qoldirishi lozim.
Arra diskida arralanayotgan paytda jarayon oxiriga yetmay turib, zagotovkani qo’lda surish qat’iy taqiqlanadi; bunday vaqtda zagotovkani navbatdagi zagotovka bilan yoki maxsus yog’och yordamida surish kerak.
Arra ishlab turganda uni qo’lda yoki bir parcha yog’och bilan to’xtatish, to’sig’ini ko’tarish yoki olib qo’yish, dastgohni yoki arra kirib turadigan tirqishni tozalash ham taqiqlanadi.