Texnologik jarayon va struktura sxemaning tavsifi

Sokni gomogenizasiyalash. Saqlash vaqtida qatlamlanishni bartaraf etish maqsadida sokni bir jinsli qilish uchun, ya’ni undagi muallaq zarralarni maydalash uchun u gomogenizasiyalanadi.
OGB turdagi gomogenizator gorizontal uch plunjerli nasos boʻlib mahsulotni yuqori bosim ostida gomogenizasiyalovchi klapan va egar yuzalari oraligʻidagi kapillyar zazordan oʻtqazadi. 65°S-gacha isitilgan tomat sokini 7 MPa bosim ostida gomogenizasiyalash tavsiya etiladi.
Jilgʻali gomogenizatorda mahsulotni isitilgan bugʻ yoki havo oqimi olib ketadi, purkaladi va katta tezlikda harakatlanib mayda toʻr orasidan oʻtadi. Bu usulning kamchiligi shundan iboratki, bugʻ sokni suyultiradi, havo esa aerasiyalaydi.
Mahsulotga ultratovush bilan ishlov berib ham gomogenizasiyalash mumkin. Ammo tovush bilan ta’sir etilganmahsulotni keyinchalik saqlash davrida askorbin kislotasi parchalanadi.
Sokni deaerasiyalash. Chuqur vakuum ostida deaerasiyalangan mahsulot tarkibida S vitamini saqlanib qoladi. Oʻxshash samaraga mahsulotni qadoqlashdan ilgari isitish natijasida erishiladi. Shuning uchun koʻplab zavodlarda tomat soki mexanik usulda deaerasiyalanmaydi.
Sokni qadoqlash. Tomat soki issiq holatda uch litrli bankalarga, boshqa turdagi shisha idishlarga, temir bankalarga qadoqlanadi. Mahsulot solingan tara germetik tarzda berkitiladi. Tomat sokini saqlash vaqtida S vitamini yoʻqolmasligi uchun bankada qolgan boʻshliqdan havo chiqariladi. Bu vakuum-qadoqlagich va vakuum-berkitgichlar mashinalar yordamida amalga oshiriladi.
Mahsulotning kimyoviy moddalariga yorugʻlik nurlari ta’sir etmasligi uchun tomat soki toʻq rangli shishadan tayorlangan bankalarga qadoqlanadi.
Tomat soki paketlarga ham qadoqlanadi (qogʻazdan tayyorlangan tetrapak, alyuminiy folgadan tayyorlangan aseptik paketlar). Ularni ichkari tomoni past zichlikka ega polietilen bilan qoplangan. Qogʻaz paketlarning tashqi tomoni ozuqaviy parafin bilan qoplangan. Qadoqlashdan ilgari sok 15-20°S-gacha sovutiladi, germetik berkitilgandan soʻng -18°S temperaturagacha muzlatiladi va ushbu temperaturada saqlanadi.