Tasdiqlayman” o ’quv ishlar bo’yicha prorektor V b. R. G’. Jumayev

1-MAVZU: ORNAMENT VA TASVIRIY SAN’ATNING PAYDO BO’LISH SABABLARI. TASVIRIY SAN’ATNING TUR VA JANRLARI

1.1. Fanning ob’yekti, predmeti, maqsad va vazifalari.

O’rta Osiyo ornamenti va tasviriy san’ati tarixi fanining ob’yektini mezolit, neolit, eneolit, bronza temir davri ornamentlari, Qadimgi Xorazm va Baqtriya davlatlari tasviriy san’ati va ornamenti, O’rta Osiyoning ahamoniylar davriga oid tasviriy san’ati namunalari, o’rta asrlarda vujudga kelgan san’atning yangi yo’nalishlari, jangu jadallar, bazmlar, tantanalar va marosimlar aks etgan ornament va tasvirlar, rivojlangan o’rta asrlar hamda xonliklar davri tasviriy san’ati, me’moriy obidalari va ulardagi tasvirlar tashkil etadi.

Fanning maqsadi - O’rta Osiyo tarixi turli xil ijtimoiy voqea va hodisalarga, diniy va madaniy qatlam, g’oyaviy dunyoqarash, falsafiy oqimlarga boy bo’lib, jahon sivilizatsiyasining eng qadimiy o’choqlaridan biri hisoblanadi. O’rta Osiyo ornamenti va tasviriy san’ati tarixi fanining maqsadi tariximizni kengroq yoritish, talabalarning tarixiy tafakkurini yuksaltirish, tarixga nisbatan xolisona baho berishga o’rgatishdan iborat.

Fanning vazifalari:

• 
  O’rta Osiyo ornamenti va tasviriy san’ati tarixining milliy va ma’naviy jihatlarini ilmiy tahlil etish;
  
• 
  O’rta Osiyo xalqlari moddiy merosining tarixiy ahamiyatini talabalarga tushuntirish;
  
• 
  Talabalarda ornament va tasviriy san’at haqida tushuncha va ko’nikmalarni hosil qilish;
  
• 
  Tarixiy dunyoqarashni moddiy ashyolar, buyumlar, me’moriy inshootlarda aks etgan ornament va tasviriy san’at asosida rivojlantirishdan iborat.
  

Ushbu fan orqali talabalar O’rta Osiyoda san’at va ornamentning vujud kelishi va rivojlanish bosqichlarini xronologik tartibda o’zlashtiradilar. O’rta Osiyo xalqlarining qadimgi davrdan XX asr oxirlariga qadar bo’lgan san’ati va ornamenti haqida bilim va ko’nikmalarga ega bo’ladilar.