«тасдиқлайман» Бухоро давлат университети илмий ишлар ва инновациялар

Тадқиқотнинг илмий янгилиги қуйидагилардан иборат:
экологик талофатлар, девиант ҳаракатлар ва нигилистик кайфиятни олдини олишда исломий манбалар (Қуръони карим ва Ҳадислар)даги табиатнинг қонун ва меъёрларини бузмаслик, табиат борлиғи компонентларининг табиий-биологик хусусиятларини сақлаш сингари ғоялардан унумли фойдаланиш зарурияти фалсафанинг атрибутив категориялари воситасида аниқлаштирилган;
Юсуф Ҳамадонийнинг “Фи аннал-кавна мусаххарун лил-инсон” (“Коинот ва инсон ҳақида”) рисоласидаги тасаввуфий қарашлар экологик муаммоларнинг олдини олишда субстанционал вазифани бажариши мантиқий жиҳатдан далилланган;
“табиат-жамият-инсон” муносабатлари уйғунлигини таъминлашда диний манбалар (“Авесто”, “Таврот”, “Қуръони карим” ва Ҳадислар)даги мувофиқлаштирувчи ва барқарорлаштирувчи диний-экологик парадигмалар (табиатнинг барча неъматларига эҳтиёткорона муносабатда бўлиш, инсон - табиат олами учун масъуллиги, табиат манбаларини эҳтиёж доирасида ишлатиш)нинг ижтимоий аҳамияти фалсафанинг умумийлик ва хусусийлик категориялари воситасида асосланган;
экологик ҳуқуқ-нормаларга риоя қилишнинг бирламчи кўринишлари (табиатга зиён келтирган шахсга нисбатан жазо чораларининг мавжудлиги, экологик фаолликни рағбатлантириш) зардуштийликнинг муқаддас китоби “Авесто”да илмий асосланганлиги исботланган.
Тадқиқотнинг амалий натижалари қуйидагилардан иборат:
аҳолининг диний-экологик онгини шакллантирувчи объектив ва субектив усул-воситалар аниқлаштирилган;
“Экология”, “Ижтимоий экология”, “Диншунослик” фанларини ўқитишнинг замонавий концепциясини яратиш зарурлиги асосланган ва экологик офатларнинг олдини олиш бўйича аниқ кўрсатмалар, табиий экологик меъёрга риоя қилиш зарурлиги кўрсатилган;
экологик муаммоларни ечишда диний манбалар орқали аҳолининг диний онгини шакллантириш билан боғлиқ бўлган муаммоларга доир илмий-назарий хулосалар умумлаштирилган;
“диний-экологик онг” феноменининг шаклланиш ва ривожланиш қонуният-ларини ривожлантириш бўйича таклиф ва тавсиялар ишлаб чиқилган.