Тактиканинг фан сифатида вазифалари

Mudofaa barqaror va faol bo‘lishi, dushmanning ustun bo‘lgan kuchlarining, uning havo (aeromobil) desantlari va qo‘poruvchi-razvedka guruhlari tomonidan qo‘llab-quvvatlab turilgan hujumiga, qurol-yarog‘ning barcha turlaridan berilgan zarbalarga qarshi turishga qodir bo‘lishi kerak.

Mudofaaning barqarorligi va faolligiga mudofaada turgan bo‘linmalar dushmanning hujumlarini qaytarishdagi sabot va matonati, chidami, ularning yuksak ma’naviy ruhiy, mohirona tashkil etilgan mudofaa va o‘t ochish tizimi; dushmanni uzluksiz razvedka qilish, tayanch punktining (o‘t ochish pozitsiyasining) puxta niqoblanishi, joyning qulay sharoitlari va uning muhandislik inshootlaridan mohirona foydalanish, ommaviy qirg‘in qurollari ta’siridan himoya qilish bo‘yicha tadbirlarning bajarilishi, shaxsiy tarkibning uzoq vaqt davomida jangovar harakatlar olib borishiga, shu jumladan, to‘liq qurshovga olingan sharoitlarda jang qilishga tayyorgarlik ko‘rish ta’minlanishi orqali erishiladi.

Mudofaada har bir askar o‘z qurolidan, fortifikatsion inshootlardan va joyning qulay sharoitlaridan mohirona foydalangan holda dushmanning katta miqdordagi tirik kuchini yo‘q qilishga va uning hujum qilayotgan tanklari hamda boshqa zirhli mashinalariga qarshi muvaffaqiyatli kurash olib borishga qodir.

Motoo‘qchi (tank) guruhning (seksiya, tank) egallab turgan tayanch punkti (pozitsiya) ni tashlab ketish va vzvod (guruh) komandirining buyrug‘isiz chekinishga haqqi yo‘q.

2.1. Guruh mudofaada

Motoo‘qchi (tank) guruhi o‘z qurolidan, joy va uning muhandislik inshootlaridan hamda g‘ovlardan mohirlik bilan foydalangan holda hujum qilayotgan dushmanga katta talafot etkazish va egallab turgan pozitsiyalarni saqlab turishga qodirdir. U, odatda, vzvod tarkibida mudofaa qiladi, batalon zaxirasida turishi, jangovar soqchilikka, jangovar razvedka dozoriga va o‘t ochish pistirmasiga tayinlanishi, kuchlarning bir qismi yoki to‘liq tarkib bilan batalon (vzvod) ning zirhli guruhiga kirishi mumkin.

Motoo‘qchi guruh front bo‘ylab 200 m gacha va ichkariga 200 m gacha bo‘lgan tayanch punktini mudofaa qiladi. Tank vzvodining tank guruhi front bo‘ylab 400 m gacha va ichkarisiga qarab 300 m gacha bo‘lgan tayanch punktini mudofaa qiladi.