Tadbirkorlik asoslari sohasi

III bob yuzasidan savollar:
1. Audit qilish tartibi qanday?

2. Auditorlarning vazifalari nimalardan iborat?

3. Ombor xo‘jaligi nima vazifani bajaradi?

4. Tovar-moddiy boyliklarning sarflanishi qanday tekshiriladi?

5. Inventarizatsiya nima?

6. Inventarizatsiya qaysi standartlar asosida o‘tkaziladi?

7. Rejali inventarizatsiya nima?

8. Rejasiz inventarizatsiya nima?

9. Inventarizatsiya o‘tkazish tartibi qanday?

10. Resurs inventarizatsiyasini tashkil qilishda nimalar muhim ahamiyatga ega?

IV BOB.
32–33-MAVZULAR: MAHSULOT YETKAZIB BERUVCHILAR BILAN MUNOSABATLARNI YO‘LGA QO‘YISH. MAHSULOT YETKAZIB BERUVCHILAR SONINING AHAMIYATI

Hamma ishlab chiqarish korxonalari yetarli miqdorda asbob-uskuna, jihozlar, xomashyo materiallari bilan ta’minlangan bo‘lishi, ishlab chiqarishga ketgan sarflar va tayyorlangan mahsulotlar hisobga olinishi, tayyor mahsulotlar tannarxini aniqlash, xaridorlarga sotish va ular bilan hisob-kitob qilish, korxonalarning mahsulot ishlab chiqarish faoliyati natijalari aniqlanishi zarur. Korxonalarda bunday operatsiyalarning buxgalteriya hisobi tegishli hujjatlar asosida qayd qilib boriladi, boshqaruv ma’muriyatini ishlab chiqarishni yanada rivojlantirish bo‘yicha barcha ma’lumotlar bilan ta’minlaydi.

Shuning uchun ham sanoat korxonalarida buxgalteriya hisobi quyidagi vazifalarni bajaradi:

- mahsulot ishlab chiqarish rejalarining bajarilishini nazorat qilish;

- ishlab chiqarish xarajatlarini to‘g‘ri va o‘z vaqtida hisobga olib borish;

- ishlab chiqarilayotgan mahsulotning tannarxini to‘g‘ri aniqlash;

- moddiy boyliklarning butunligini nazorat qilish;

- behuda xarajatlar, nobudgarchiliklarning oldini olish va korxona samaradorligini oshirish;

- asosiy va aylanma mablag‘lar harakatini to‘g‘ri hisobga olib borish va ulardan maqsadga muvofiq foydalanishni nazorat qilish;

- yangi texnika, ilg‘or tajribani joriy qilish, xomashyo va materiallarning tejamli sarflash normalarini qo‘llashga yordam berish;

• 
  korxona rahbarlarini o‘z vaqtida aniq va ishonchli ma’lumotlar bilan operativ ta’minlab turish.
  

Bu vazifalarni bajarishi uchun sanoat korxonalari buxgalteriya hisobiga tegishli qonun-qoidalar, yo‘riqnomalar, nizomlar bilan ta’minlangan bo‘lishlari, qo‘llanmalar, hisob registrlari bo‘lishi, hisobchilar yetarli bo‘lib, hisob ishlari yaxshi tashkil qilingan bo‘lishi zarur.