Стресс профилактикаси

СТРЕСС ОҚИБАТЛАРИ
Психоэмоционал зўриқиш (стресс)юракнинг ишемик касаллиги, қон босими ошиши, атеросклероз, неврозлар, ошқозон ва 12 бармоқ ичак яра касаллиги, ўсма шишлар, қандли диабет, тиреотоксикоз ва шунга ўхшаш кўплаб касалликларга олиб келади. Чунки бунда асаб толалари доимо зўриқади, таранглашади, оқибатда руҳий ва жисмоний қувват тақсимотида бузилиш рўй беради. Оилада, ишда ва жамиятда юз бериб турадиган зиддиятли ҳолатлар – салбий эмоционал стресслар бу мувозанатни издан чиқаради Мутахассисларнинг таъкидлашича, касалликларнинг 70%и эмоционал бузилишлар, яъни стресс ҳолатлари билан боғлиқ экан. Европа мамлакатларида йилига миллионга яқин инсон стрессоген вазиятлар туфайли, юрак фаолияти бузилишидан оламдан ўтар экан.

АТРОФДАГИЛАРГА НИСБАТАН ОРТИҚЧА ТАЛАБЧАН БЎЛМАНГ!!!
Атрофдагиларга ортиқча талабчан бўлишингиз сизда руҳий зўриқишни юзага келтиради. Агар Сиз яқинларингизнинг доимий равишда камчиликларини танқид остига олиб, уларни ўзгартиришга киришган бўлсангиз – катта хатога йўл қўйган бўласиз.Донолардан бири “Агар сен вазиятни ўзгартира олмасанг, вазиятга нибатан ўз муносабатингни ўзгартир”, деб таъкидлаган экан. Шундай экан, атрофдагиларни шундайлигича қабул қилинг, вақти келиб улар ҳақиқатан ҳам ўзгарганининг гувоҳи бўласизҲар биримизда пайдо бўлаётган фикр ўз-ўзидан шу фикрга доир эмоционал ҳолатни уйғотади, бу ҳолат эса шу ҳолатга мос бўлган хатти-ҳаракатларни юзага келтиради. Шунингдек, ҳар қандай ижобий ҳаракат — юздаги табассум, бош ва елкани тик тутиш кабилар мияда ҳам ўз-ўзидан шу ҳаракатларга мос келадиган фикрни уйғотади. Демак, одамда руҳият ва кайфият, фикр ва ҳаракат ўзаро мутаносиблик касб этган.
Шунинг учун сиз ҳам доимо ўзингизга ишонинг, бу ишонч эса кайфиятингиз орқали ҳаракатларингизда, юзингизда, юриш-туришингизда акс этиб турсин.
Ҳаёт қадрига етинг, севимли машғулотларга вақт ажратинг
Одамнинг ўз тан-сиҳатлигини сақлаш тизими уч асосий қоида: ўзини англай олиш, тарбиялай олиш ва ўз билимини амалга ошира олишга асосланади. Инсон тан-сиҳатлигини сақлаш қурилмасига яна учта яхши туйғу: ишонч, умид ва муҳаббат киради. Улар ичида энг асосийси - ишонч инсон умри ва саломатлигининг асосидир. «Ихлос - халос», дегани шу бўлади. Инсон имкониятлари чексиздир. Ўз кучига ишонган одам ҳамма нарсанинг уддасидан чиқади. Фақат инсонда руҳ ва вужуд соф бўлмоғи, мияси хайрли ниятлар, тоза тилакларга тўлиқ бўлмоғи, бир сўз билан айтганда, одамда маънавият бирламчи бўлмоғи даркор