So‘z boshi

«Kim nima qiladi?» o‘yini. O‘quvchilar 2 guruhga bo‘linib, doska yoniga har bir guruhdan bittadan o‘quvchi taklif etiladi. Doskaga birinchi guruh ishtirokchisi kim? so‘rog‘iga javob bo‘ladigan so‘zlarni yozsa, ikkinchi guruh ishtirokchisi nima qiladi? so‘rog‘iga javob bo‘ladigan so‘zlarni yozadi. Natijada yig‘iq gaplar vujudga kelishi kerak.

Qolgan ishtirokchilar esa gaplarni daftarlariga ko‘chirib yozadilar. Bunda o‘quvchilarning yozma savodxonligiga ham hisobga olinadi. Qaysi guruh a’zosi topshiriqni bexato bajarsa, shu guruhga «rag‘bat» kartochkasi topshiriladi.

“Zanjir” o‘yini. O‘qituvchi birinchi bo‘lib so‘z aytadi. O‘quvchilar bu so‘z qaysi harf bilan tugagan bo‘lsa, shu harf bilan boshlanuvchi so‘zni topib aytadilar. So‘z o‘yini shu tarzda davom etadi. Bunday o‘yinlarning o‘tkazilishi o‘quvchilarning xotirasini mustahkamlaydi, hozirjavoblikka, mustaqil fikrlashga o‘rgatadi. Dam olish daqiqalarida yoki darsni boshlashdan oldin o‘quvchilar diqqatini to‘plab olish maqsadida foydalanish mumkin. Masalan: tabiat, maymunjon, non, nok, kitob, botir, ruchka. 2-variant: lola, ayiq, qirol, limon. 3-variant: atirgul, Laziza, Amerika, anor va h.k.

“Topag‘on” o‘yini. O‘qituvchi biror belgi asosida savol beradi. O‘quvchilar shu belgini o‘ziga jam qilgan predmetlar nomlarini yozadilar, eng ko‘p to‘g‘ri javob topgan o‘quvchilar g‘olib sanaladi. Bu o‘yin orfqali o‘quvchilarning so‘z boyligi ortib, ularda hozirjavoblik, ziyraklik, ijodkorlik kabi sifatlar shakllanadi. Masalan: 1-variant: savol: nima oq rangda? Javob: bulut, parda, qog‘oz qor. 2-variant: Savol: nima yumshoq? Non, paxta, xamir, yostiq. 3-variant: savol: Nigora nima qilayapti? Javob: kitob o‘qiyapti, o‘ynayapti va h.k.