Сиртқи таълим шакли талабалари учун назорат ишларини бажариш, расмийлаштириш ва бахолаш тартиби тўғрисида

ЎЗБЕКИСТОН РЕСПУБЛИКАСИ
ОЛИЙ ВА ЎРТА МАХСУС ТАЪЛИМ ВАЗИРЛИГИ
МИРЗО УЛУҒБЕК НОМИДАГИ
ЎЗБЕКИСТОН МИЛЛИЙ УНИВЕРСИТЕТИ


Сиртқи таълим шакли талабалари учун назорат ишларини бажариш, расмийлаштириш ва бахолаш тартиби тўғрисида


ЙЎРИҚНОМА
Университет - 2017
Мирзо Улуғбек номидаги Ўзбекистон Миллий университети
сиртқи таълим шакли талабалари учун назорат ишларини бажариш, расмийлаштириш ва бахолаш тартиби тўғрисида


Йўриқнома

1. 
   Умумий қоидалар
   

1.1.Мазкур Йўриқнома Ўзбекистон Республикасининг “Таълим тўғрисидаги” (Ўзбекистон Республикаси Олий Мажлисининг Ахборотномаси, 1997 йил 9-сон, 225-модда) ва “Кадрлар тайёрлаш Миллий дастури тўғрисида”ги (Ўзбекистон Республикаси Олий Мажлисининг Ахборотномаси, 1997 йил 11-12-сон, 295-модда) қонунларига, Ўзбекистон Республикаси Вазирлар Маҳкамасининг 21 ноябрь 2017 йилда “Олий таълим муассасасида сиртқи (махсус сиртқи) ва кечки (сменали) таълимни ташкил этиш тартиби тўғрисида”ги низомларни тасдиқлаш ҳақидаги №930-сонли Қарори, Ўзбекистон Республикаси таълим муассасаларига қабул қилиш бўйича Давлат комиссияси томонидан 2008 йил 13 августдаги №15-сонли баёни билан тасдиқланган “Ўзбекистон Республикаси таълим муассасаларида иккинчи ва ундан кейинги таълим олиш тартиби тўғрисида”ги Низом талабларига мувофиқ ишлаб чиқилди.

1.2.Сиртқи таълим шакли талабаларининг ўқув жараёнидаги материалларни ўзлаштириш ва тегишли фанлардан билим, кўникма ва малакаларни мустақил эгаллашларида энг асосий воситалардан бири назорат иши хисобланади.
1.3.Назорат иши ўқув режасидаги фанлар бўйича берилган тегишли мавзуларни тавсия этилган адабиётлар ва манбалар асосида тўлиқ ва тизимли ёритиб бериш вазифаларини ўз ичига олади.
1.4. Назорат ишларини ўтказишнинг мақсади:
- талабаларни билимларини текшириш ва бахолаш;
- талабаларни мустақил фаоллиги, ахборотларни қабул қилиши хамда ўқув фаолиятини шакл ва услублари самарадорлигини ошириш;
- талабаларда ўқув адабиётлари, бирламчи манбалар, ўқув ва илмий тадқиқот ишларини олиб бориш бўйича мустақил ишлаш кўникмаларини шакллантириш.
1.5.Назорат ишларини сони сиртқи таълимни тегишли бакалавриат таълим йўналишларини ишчи ўқув режаларига асосан аниқланади. Семестр давомида назорат ишлари хар бир фандан кўпи билан 2 - тадан ошмаслиги лозим.
1.6.Профессор-ўқитувчилар томонидан талабаларнинг назорат ишларини ўз вақтида кўриб чиқиш, бахолаш ва тақриз ёзиш ишларини назорат қилиш тегишли таълим йўналишларида сиртқи таълим бўйича масъул шахслар зиммасига юклатилади.
1.7.Назорат ишларини бажарилиши, текширилиши ва уларга тақризлар ёзилиши замонавий ахборот технологиялари асосида бажарилиши мумкин.