Ш. Н. Янгиев тиқхмми қарши филиали 1 босқич магистранти

ИССИҚХОНАЛАР ШАРОИТИДА БОДРИНГНИ ТОМЧИЛАТИБ СУҒОРИШ ТЕХНОЛОГИЯЛАРИ, МЕЪЁРЛАРИ ВА МУДДАТЛАРИ
Ш.Н.Янгиев
ТИҚХММИ Қарши филиали
1 босқич магистранти
Аннотация. Ўзбекистонда куз, қиш ва баҳорда гидропоника усулида бодринг етиштириш мумкин. Мақолада иссиқхоналар шароитида бодрингни томчилатиб суғориш меъёрлари ва муддатлари ўрганилган.
Калит сўзлар: бодринг, гидропоника, сўғориш усуллари, ҳосилдорлик кўрсатгичлари.
Кириш. Мамлакатимизда сув ресурсларидан фойдаланиш механизмларини тубдан ислоҳ қилиш, улардан оқилона ва самарали фойдаланишни таъминлаш, иқтисодиёт тармоқларида сув тежовчи технологияларни жорий этишни қўллаб-қувватлаш ва рағбатлантириш, шунингдек, суғориладиган ерларнинг мелиоратив ҳолатини яхшилаш бўйича изчил чора-тадбирлар амалга оширилмоқда.
Амалга оширилаётган чора-тадбирлар, шунингдек, давлат томонидан қўллаб-қувватлаш механизмлари 2019-йилнинг ўзида қўшимча 33,2 минг гектарда сув тежовчи суғориш технологиялари жорий этилишини таъминлаш имконини берди, бу эса шу каби технологиялар қўлланилаётган ерлар умумий майдонининг 44 фоизини ташкил этди.
Бироқ, сув тежовчи суғориш технологиялари қўлланилаётган умумий майдон атиги 75 минг гектарни ёки умумий суғориладиган ер майдонларининг 1,7 фоизини ташкил этаётганлиги қишлоқ хўжалигида сув тежовчи технологиялардан фойдаланишни кенгайтиришга ва сув ресурсларидан фойдаланиш самарадорлигини таъминлашга қаратилган чора-тадбирларни янада фаоллаштириш заруратини тақозо этмоқда.[1]
Қишлоқ хўжалик экинларини меъёрида ўсиши, ривожланиши ва мўл ҳосил тўпланишида, шунингдек тупроқ таркибидаги озуқа моддаларини мутадил ҳолатда эритиб ўсимликлар учун мақул миқдорда тупроқ эритмаси концентрациясини вужудга келтиришда суғориш меъёрлари ва муддатларининг аҳамияти жуда катта, маълумки ҳар бир ўсимликнинг сувга бўлган талаби турлича бўлиб, у ўсимликлар, турларига ва ҳар бир навларининг биологик хусусиятларига, тупроқнинг сув-физик хоссаларига, механик таркибига, тупроқ таркибидаги органо-минерал моддаларнинг миқдорига боғлиқ бўлади.