Tasavvufiy yo‘nalish. YAngi davr axloqshunosligida tasavvufiy yo‘nalishning ham o‘z o‘rni bor. Bu borada naqshbandiya tariqatining kenja bo‘g‘in mutafakkirlaridan bo‘lmish buyuk turk allomasi Muhammad Zohid Qutqu (1897–1980) va uning shogirdi, zamondoshimiz professor Mahmud As’ad Jo‘shonning (1938–2001) qarashlari alohida diqqatga sazovor. Muhammad Zohid Qutqu besh jildlik «Tasavvufiy axloq« deb nomlangan fundamental asarida boshqa axloqiy masalalar bilan birga jo‘mardlik tushunchasini, Jo‘shon esa o‘z asarlarida nafs va uni engish muammolarini o‘rtaga tashlaydilar.
Mahmud As’ad Jo‘shon o‘z asarlarida tasavvufni bir tomondan Allohni bilish, tanish uchun, ikkinchi tomondan o‘z nafsini tarbiyalash, ruhiy–axloqiy jihatlarini tuzatish uchun qilingan hatti–harakatlar tajassumi deb ta’riflaydi. U ba’zi bir aqidaparastlarning, tasavvufning Islomga aloqasi yo‘q, hatto ular bir–biriga qarama–qarshi, degan fikrlarini keskin rad etarkan, hazrati payg‘ambarimizning mutasavviflar sultoni, sahobalarning esa ahli tasavvuf bo‘lganini isbotlab beradi.
Do'stlaringiz bilan baham: |