Савол: Ўзбекистон Республикаси Вазирлар Маҳкамаси фармойишининг ҳуқуқий табиатини ёритинг

Муаммоли савол

1. 
   Норматив-ҳуқуқий ҳужжатлар ўртасида тафовут бўлган тақдирда масала қандай ҳал қилинади?
   

27-масала.
Ўзбекистон Республикаси Президенти ваколати муддати тугаши муносабати билан истеъфога чиқди ҳамда Ўзбекистон Республикаси Конституциясининг 97-моддасига биноан Ўзбекистон Республикаси Олий Мажлиси Сенатининг умрбод аъзоси лавозимини эгаллади. Мазкур муносабат бидан Сенат Кенгашининг навбатдаги мажлисида парламент юқори палатаси Раиси Сенат таркиби Конституцияга мувофиқ 100 нафар сенатордан иборат бўлиши кераклигини кўрсатган ҳолда давлат бошлиғи томонидан Ўзбекистон Республикаси Конституциясининг 77-моддаси асосида тайинланган 16 нафар сенатордан бирини Сенат аъзолиги лавозимидан озод этиш таклифи билан Президентга мурожаат қилиш тўғрисидаги масалани кун тартибига киритди. Бироқ Олий Мажлиси Сенати Кенгашининг бошқа аъзолари Кенгаш раисининг таклифига эътироз билдириб, парламентнинг юқори палатаси 100 нафар аъзодан ортиқ таркибда ҳам фаолият юритиши қонунчиликка зид эмаслигини таъкидлаб ўтдилар.
Савол:
Вазиятга ҳуқуқий баҳо беринг.
Ушбу ҳолатни Ўзбекистон Республикаси қонунчилиги доирасида муҳокама қилинг.


Муаммоли савол

1. 
   Конституцияга мувофиқ фуқароларнинг ҳуқуқларидан маҳрум қилиш ёки ҳуқуқларини чеклаш қайси давлат органи орқали амалга оширилади?
   

28-масала.
Миробод туманида яшовчи фуқаро А. 2012 йил ноябрь ойида туман ҳокимиятига мурожат қилиб фарзанд асраб олмоқчилигини айтади. Туман ҳокимияти унга ўзи хақидаги маълумотларни бериши ва иш жойидан маълумотнома олиб келишлигини сўрайди. Фуқаро А. айтилган барча ҳужжатларни олиб келади, лекин ҳужжатлар ичида фуқаро А. қаерда ишлаши ҳақидаги маълумотнома чиқмайди. Шундан сўнг туман ҳокимияти ходими унга ҳужжатларида камчилиги борлигини айтиб, агарда, у тегишли ҳужжатларни икки кун ичида олиб келмаса унга фарзанд асраб олишга рухсат берилмаслигини айтади. Фуқаро А ушбу ҳолат юзасидан Ўзбекистон Республикаси Конституциявий судига мурожаат қилади ва ўзининг конституциявий ҳуқуқлари бузилганлигидан эътироз билдиради. Ўзбекистон Республикаси Конституциявий суди ушбу мурожаатда кўтарилган масалалар фуқаролик ишлари бўйича туманлараро суд ваколатига тегишли бўлганлиги сабабли, мазкур шикоят Конституциявий суд ваколат доирасига кирмаслигини билдирди.