Ўрта махсус таълим вазирлиги

Сочилувчан материаллар. Қанд, туз, ун ҳамда зираворлар, қуритилган сабзавот ва қўзиқорин магнитли сепаратордан ўтказилади.
Гўшт. Яхлатилган гўшт эритилади, янги сўйилган (ҳали иссиқ) ёки совутилган гўшт тўғридан-тўғри қайта ишланади.
Таналар туалет қилинади, яъни қон теккан жойлари совуқ сувда ювилди, пичоқ билан бўлакларга ажратилади, суякдан ажратилади, пай ва йирик қон томирлари олинади. Гўшт танасида ёғ ажратиб олинади. Ушбу ёғ гўштни қовуриш ва консервалар ишлаб чиқариш учун ишлатилади.
Биринчи овқатларни ишлаб чиқариш учун ҳайвон гўшти 50-60 г –ли бўлакларга кесилади, бевосита банкаларга тахланади.
Иккинчи овқатларни ишлаб чиққанда пайлари олинган гўшт 100 г-ли бўлакларга бўлинади ва 110⁰С температурали ёғда пассировка (қовуриб димлаш) қилинади. Қовуришда камайишнинг кўринар фоизи 30% -га тенг бўлиши керак. Пассировка қилинган гўшт банкаларга жойлаштирилади. Гўштни қовуришда қолгвн ёғ ва бульон гўшт-сабзавот консервалари ишлаб чиқаришда ишлатилади.
Биринчи овқатлар учун гўшт-суяк бульони тайёрлаш мақсадида майдаланган суяк устига сув қуйилади ва 4 соат паст температурада қайнатилади. Сўнгра бульон суякдан ажратилади, гўшт, илдизмевалар, пиёз қўшилади, устига яна сув қуйилади ва бульонга экстрактив моддаларнинг 70%-и ўтишини таъминлаш учун 1 соат қайнатилади. Бульонда биринчи овқатларни консервалаш учун мўлжалланган гўшт ҳам бланширланади. Бульон устида пайдо бўлган кўпик олинади, ёғ эса йиғилади, қиздириб намлиги кеткизилади, фильтрланади ва сабзавотга ишлов бериш учун ишлатилади.
Пиширилган бульон таркибида 2-2,5% қуруқ модда мавжуд. У тиндирилади ва қуруқ модда миқдори 9-10% бўлгунча қайнатилади.
Суяк бульони тўш, тос ва мия суякларидан тайёрланади. Суяклар қозонга солинади, сув қуйилади ва паст оловда қайнатилади. Қайнатиш тугалланиши олдидан илдизлар, пиёз, ва дафна барги солинади. Тайёр бўлган бульон тиндирилади ва қуйма тайёрлаш учун ишлатилади.
Кунгабоқар мойи. Консерва ишлаб чиқаришда фойдаланишдан илгари кунгабоқар мойи чучутилади.