XULOSA Xulosa o’rnida Respublikamiz Prezidentining «…qachonki qimmatli qog’ozlarning ikkilamchi bozori to’la ishga tushsa, fond birjasi tom ma’noda faoliyat ko’rsatsa, qachonki aksiyalar qiymati muntazam e’lon qilib borilsa, alohida aksiyalar sotib olishga ishtiyoq va intilish tug’ilsa, aksiyalarning o’zi esa shunchaki oddiy qog’oz bo’lib qolmasdan, haqiqiy qimmatli qog’ozga aylanib, o’z egalari uchun muhim daromad manbai bo’lsagina, xususiylashtirish jarayoni aniq mazmun va ko’rinishga ega bo’ladi»7deb takidlagan so’zlarini keltirish maqsadga muvofiq. Zero, ushbu so’zlar iqtisodiy islohotlarni yanada chuqurlashtirish va liberallashtirish, xususiylashtirish jarayonlarini rivojlantirishga yangicha yondashish masalalari, hamda mamlakatimiz fond bozorini yanada rivojlantirish bo’yicha dasturulamal bo’lishi lozim va bo’lib kelmoqda.
Iqtisodiyotni modernizatsiyalash sharoitida O’zbekiston moliya bozorida investorlar sonini ko’paytirishning asosiy omillari quyidagi masalalarni yechish bilan bog’liqdir:
1. Mamlakatimiz fond bozorining kapitallashuv darajasini yanada oshirish;
2. Uyushgan moliya bozorining rivojlanishini jadallashtirish va birja infratuzilmasini optimallashtirish. Bu moliya bozorini nazorat qilish va tartibga solish, pirovardida barqarorligining oshishiga olib keladi;
3. Moliya bozorida hisob-kitob, kliring tizimi barqarorligini oshirish va unga zamonaviy xalqaro tajribalarni joriy etish, moliya bozoridagi operatsiyalarni jadallashishiga, mablag’larni samarali foydalanishga va ushbu bozorning rivojlanishiga olib keladi;
4. Mamlakatni xalqaro moliya bozorlari bilan integratsiyasini ta’minlovchi vositalarni rivojlantirish moliya bozoriga xorijiy investitsiyalarni keng jalb etadi, milliy iqtisodiyotga xorijiy valuta tushumlarini ko’paytiradi, emitentning ishlab chiqarishini miqdor va sifat jihatdan oshishiga olib keladi;
5. Mamlakatimiz moliya bozorida hosilaviy qimmatli qog’ozlar bilan operatsiyalarni rivojlantirish (individual investorlar moliyaviy aktivlarini beqaror bozor sharoitidagi turli salbiy o’zgarishlardan himoyalaydi);
6. Kelajakda fond bozorining rivojlanishiga asos bo’la oladigan va barcha toifadagi investorlarni jalb qila oladigan salohiyatli kompaniyalarni birjaning rasmiy byulleteniga kiritish orqali listing kompaniyalari sonini ko’paytirish;
7. Moliyaviy xizmat ko’rsatish sohasida sug’urta kompaniyalar rolining oshib borayotganligini inobatga olib, ochiq aksiyadorlik jamiyati shaklidagi sug’urta kompaniyalar sonini ko’paytirish maqsadida zaruriy shart-sharoitlar yaratish va shu yo’l orqali mazkur kompaniyalarning qimmatli qog’ozlarini fond birjasi bozoriga jalb qilish;
8. Xususiy investorlar (aholi)ning qimmatli qog’ozlar bozorida erkin faoliyat ko’rsatishlari uchun qo’shimcha sharoitlar yaratish maqsadida birjada jismoniy shaxslarga tegishli bo’lgan mayda paket aksiyalarini sotuvga qo’yish uchun mo’ljallangan maxsus savdo maydonini yaratish;
9. Investorlarning o’z sarmoyalarini qimmatli qog’ozlarga erkin yo’naltira olishini soddalashtirish va ishonchini oshirishga qaratilgan birja savdosi qoidalarini tartibga solish hamda xisob-kitob va kliring texnologiyalarini takomillashtirish to’g’risidagi me’yoriy-huquqiy hujjatlarni yanada takomillashtirish;
10. Birja savdo vositalarini va texnologiyalarini yanada takomillashtirish hamda investorlar orasida repo bitimlarining afzalliklarini keng targ’ib qilish;
Tijorat banklari investitsiya faoliyatini rivojlantirishga bo’liq bo’lgan yana bir omil - bu soliqlardir. Nazariy va amaliy jihatdan investitsiyalar va soliqlar tushunchasi murakkab va ko’p qirrali, o’ziga xos muhim ahamiyatga ega bo’lgan tushunchalardir. Tijorat banklarining investitsiya faolligiga soliqlarning ta’sirini tadqiq etish uchun birinchi navbatda soliqlar bilan investitsiyalarning iqtisodiy kategoriyalar sifatidagi nazariy va uslubiy aloqasini ko’rib chiqish zarur.
Iqtisodiy islohotlarni chuqurlashtirish, ijtimoiy turmushning barcha tomonlarini erkinlashtirish jarayonini rivojlantirish sharoitida institutsional investorlar tizimi vujudga kelishi kerek. Bunda tijorat banklari bosh o’rinni egallaydi. Bu esa tijorat banklari investitsiya faoliyatini jonlantirmay turib investitsiya tanazzulini bartaraf etishga umid qilish mumkin emasligidan dalolat beradi.
