Davlat-xususiy sherikchilik loyihasini amalga oshirishda tomonlarning huquq va majburiyatlari. Xususiy sherikning loyihani amalga oshirish to‘g‘risidagi arizasi davlat sherigi tomonidan ariza tushgan kundan boshlab 15 kun ichida ko‘rib chiqiladi.
Loyihani amalga oshirish maqsadga muvofiqligi to‘g‘risida qaror qabul qilingan taqdirda, davlat sherigi va xususiy sherik o‘rtasida 7 kun mobaynida bitim tuziladi. Bitimda uning amal qilish muddati 30 yil etib belgilanadi
Hududdagi ekologiya va atrof-muhitni muhofaza qilish, sanitariya-epidemiologiya xizmati organlarining maktabgacha ta’lim muassasasini qurish bo‘yicha berilgan asoslangan salbiy xulosalari bilan taklif etilgan loyihalar davlat sherigi tomonidan 3 kun ichida rad etiladi.
Davlat-xususiy sherikchilik loyihasini amalga oshirishda tomonlarning huquq va majburiyatlari
Davlat-xususiy sheriklik loyihasini amalga oshirishda xususiy sherik quyidagi huquqlarga ega:
maktabgacha yoshdagi bolalar uchun to‘garaklar va boshqa ta’lim xizmatlarini tashkil etish;
har bir tarbiyalanuvchi uchun davlat maktabgacha ta’lim tashkilotining bir nafar tarbiyalanuvchisi uchun sarflanadigan xarajatlar summasining 50 foizigacha, O‘zbekiston Respublikasi Prezidentining 2021-yil 10-iyundagi PQ-5144-son qarori bilan tasdiqlangan olis va chekka hududlarda 75 foizigacha miqdorda O‘zbekiston Respublikasi Davlat budjetidan belgilangan tartibda subsidiyalar olish;
O‘zbekiston Respublikasi Prezidentining 2021-yil 10-iyundagi PQ-5144-son qarori bilan tasdiqlangan olis va chekka hududlarda joylashgan davlat-xususiy sheriklik asosidagi nodavlat maktabgacha ta’lim tashkilotlari “Yoshlar daftari”, “Temir daftar” yoki “Ayollar daftari”ga kiritilgan oilalarning har bir tarbiyalanuvchi farzandlari uchun mazkur daftarlar jamg‘armalari hisobidan davlat maktabgacha ta’lim tashkilotining bir nafar tarbiyalanuvchisi uchun sarflanadigan xarajatlar summasining 25 foizi miqdorida subsidiyalar olish;
davlat-xususiy sheriklik asosidagi nodavlat maktabgacha ta’lim tashkilotlariga foydalangan elektr energiyasi va tabiiy gaz xizmatlari narxining 50 foizi miqdorida Davlat budjeti mablag‘lari hisobidan oylik kompensatsiyalar olish;
foyda olish;
bitim shartlari davlat sherigi tomonidan buzilgan taqdirda bitimni sud tartibida bekor qilish.
Bitimga muvofiq xususiy sherik boshqa huquqlarga ham ega bo‘lishi mumkin.
Davlat-xususiy sheriklik loyihasini amalga oshirishda xususiy sherik quyidagi majburiyatlarni o‘z zimmasiga oladi:
bitim amal qiladigan butun muddat davomida tarbiyalanuvchilar umumiy sonining 25 foizi miqdorida ijtimoiy ko‘makka muhtoj oilalarning farzandlarini va maxsus kontingentlarni ota-onalar to‘lovini tegishli hududdagi davlat maktabgacha ta’lim tashkilotlari uchun belgilangan hajmlardan oshmaydigan miqdorda belgilagan holda imtiyozli qabul qilish;
nodavlat maktabgacha ta’lim tashkiloti binosini qurish, qurilishini tugallash, rekonstruksiya qilish, kapital ta’mirlash hamda jihozlash uchun loyiha umumiy qiymatining 25 foizi miqdorida o‘z mablag‘larini kiritish;
faoliyati davomida qonun hujjatlari talablariga, shu jumladan, davlat ta’lim talablariga rioya qilish;
bitim amal qiladigan butun muddat davomida nodavlat maktabgacha ta’lim tashkiloti faoliyat turini o‘zgartirmaslik;
nodavlat maktabgacha ta’lim tashkilotida sanitariya qoidalari va normalariga, gigiyena normativlariga rioya qilish;
nodavlat maktabgacha ta’lim tashkilotini yuqori malakali pedagogik va boshqa kadrlar bilan to‘ldirish, o‘quv-tarbiya jarayonini qonun hujjatlariga qat’iy muvofiq holda tashkil etish choralarini ko‘rish;
tarbiyalash va o‘qitishning yuqori sifatini ta’minlash uchun qulay shart-sharoitlar yaratish, shu jumladan, iste’dodli bolalarni aniqlash va qo‘llab-quvvatlash choralarini ko‘rish;
o‘qitishning innovatsion pedagogik shakllari, usullari va zamonaviy texnologiyalaridan foydalanish asosida maktabgacha ta’lim sohasidagi ta’lim jarayonining samaradorligini va natijadorligini oshirish choralarini ko‘rish;
tarbiyalanuvchilarning ota-onalar yoki ularning o‘rnini bosuvchi shaxslar bilan o‘zaro manfaatli munosabatlarni o‘rnatish, o‘qitish muddatlari va shartlarini, tomonlarning huquqlari va majburiyatlarini hamda boshqa shartlarni ular bilan kelishgan holda belgilash.
Bitimga muvofiq xususiy sherikka boshqa majburiyatlar ham yuklanishi mumkin
Davlat-xususiy sheriklik loyihasini amalga oshirishda davlat sherigi quyidagi huquqlarga ega:
xususiy sherikdan har chorakda bitim shartlarini bajarish yuzasidan axborot olish;
bitim shartlarini bajarish jarayoni ustidan monitoring olib borish va davlat-xususiy sheriklik loyihalari amalga oshirilishi holatini baholash;
qonun hujjatlariga va bitim shartlariga rioya etilishi ustidan monitoring olib borish doirasida aniqlangan kamchiliklar xususiy sherik tomonidan bartaraf etilishini talab qilish;
bitim shartlari xususiy sherik tomonidan buzilgan taqdirda, bitimni sud tartibida bekor qilish.
Bitimga muvofiq xususiy sherik boshqa huquqlarga ham ega bo‘lishi mumkin.
Davlat-xususiy sheriklik loyihasini amalga oshirishda davlat sherigi quyidagi majburiyatlarni o‘z zimmasiga olishi mumkin:
xususiy sherikning loyihani amalga oshirishga mablag‘i yetarli bo‘lmasa, unga imtiyozli kreditlar olishda ko‘maklashish;
xususiy sherikka maktabgacha ta’lim sohasida uslubiy va konsultativ yordam ko‘rsatishi;
xususiy sherikning moliya-xo‘jalik faoliyatiga aralashmaslik.
Bitimga muvofiq davlat sherigi zimmasiga boshqa majburiyatlar ham yuklanishi mumkin.
Xususiy sherik tomonidan bitim shartlariga amal qilinmasligi oqibatida bitim belgilangan tartibda bekor qilinsa:
loyihani amalga oshirish doirasida xususiy sherikka ajratilgan imtiyozli kredit tegishli bankning tijorat kreditlari uchun belgilangan foiz stavkasi asosida qayta hisoblab chiqiladi va oshirilgan foiz stavkasida qaytariladi;
so‘ndirilgan kreditlar bo‘yicha hisoblangan foiz stavkalari ham qayta hisob-kitob qilinib, yetkazilgan zarar xususiy sherikdan undiriladi;
soliq va bojxona to‘lovlari bo‘yicha qo‘llanilgan imtiyozlar ham qayta hisob-kitob qilinib, xususiy sherik tomonidan qoplanadi.
Xususiy sherikka tegishli yer va bino-inshootlarda nodavlat maktabgacha ta’lim tashkilotini tashkil etish shaklidagi davlat-xususiy sheriklikni amalga oshirish tartibining
SXEMASI
