Республика болалар ижтимоий мослашуви маркази

МУЛОҚОТЧАНЛИКНИ РИВОЖЛАНТИРУВЧИ ТРЕНИНГЛАР

Интервью (30 дақиқа)
Мақсад: Ўқувчилар бир-бири билан танишиш ва бошқаларни эшитишга ўрганади.
Гуруҳларни жуфтларга бўлиш керак. Ҳар бир бола ёнида ўтирган ўртоғига ўзи ҳақида гапириб беради. Гапираётган одамнинг гапини бўлмасдан унинг ҳикоясини диққат билан эшитиш керак. Ҳикоя 5 дақиқадан ошмаслиги лозим. Психолог вақтни назорат қилади. Барча диққат билан эшитишни ўрганганидан кейин гуруҳ бирга йиғилади. Ҳар бир бола ўзининг ҳамроҳини таништиради, эслаб қолганларни айтиб беради.

“Мен бу ” (30 дақиқа)

Бу ўйин болалар ўртасида ишончли муҳит пайдо бўлгандан кейин ўтказилади.
Мақсад: болалар бир-бирларини яқиндан танийдилар, ўзлари ҳақида гапириб беришлари учун ёрдам берилади.
Материаллар: кичикроқ қоғозлар, ҳар бир бола учун ручка ва тўғноғич. Ҳамма болаларга қоғоз ва ручка тарқатилади. Ҳар бир бола 5 дақиқа давомида ўзини таърифловчи 10 та сўз ёки жумла ёзади. Ўзининг тавсифини ҳар бир бола қоғозга ёзиб, кўкрагига қадаб олади. Маълум вақт ўтиб, болалар айвончада айланиб, бир-бирлари ҳақидаги тавсифларни ўқий бошлайдилар. Ҳамма ўқиб бўлгандан кейин, давра қуриб ўтирадилар, ким нимани эслаб қолса, ҳайратга солган, кулдирган бўлса шуларни муҳокама қилади.

Копток (5 дақиқа)

Мақсад: Болалар исмини эслаб қолиш ва гуруҳдаги безовталикни тарқатиш.
Материаллар: коптокча.
Ҳамма болалар давра қуриб турадилар. Психолог бирор болага копток отади, бунда у ўзини ва коптокни отган боланинг исмини айтади. Ўйин иштирокчилари бир-бирларининг исмларини қайта-қайта сўраб эслаб қолгунларича ва коптокни тез-тез оширгунларича давом этади.

“Барчанинг эътиборида”

Мақсад: муомаланинг вербал ва новербал воситаларини умумлаштириш. Муомаланинг турли воситаларини қўллаган ҳолда атрофдагиларнинг диққатини жамлаштириш малакасини шакллантириш.
Барча иштирокчилар айнан бир масалани атрофдагиларни жалб қилган ҳолда (албатта жисмоний куч ишлатмай) ҳал қилишлари керак. Сарфланадиган вақт: 15 дақиқа.