Режа Ўзбекистон Республикаси Молия вазирлиги ҳузуридаги Суғурта бозорини ривожлантириш агентлиги

3-боб. Календарь бадалининг миқдорини аниқлаш тартиби
7. Календарь бадали суғурта (қайта суғурта) ташкилотлари томонидан ҳар чоракда Агентликнинг ғазна ҳисобварағига тегишли миқдордаги пул маблағларини ўтказиш орқали киритилади.
8. Календарь бадали ставкаси суғурта (қайта суғурта) ташкилотларининг соф суғурта мукофотларининг 0,1 фоизи миқдорида белгиланади.
9. Ҳар бир ўтган чорак учун соф суғурта мукофотлари қуйидагича ҳисобланади:
тўғридан-тўғри суғурта ва биргаликда суғурта (суғурта ташкилотининг биргаликда суғурталаш шартномасида белгиланган улуши) бўйича суғурта мукофотлари ҳамда кирувчи қайта суғурта мукофотлари йиғиндисидан чиқувчи қайта суғурта мукофотлари чегириб ташланади.
10. Календарь бадалининг 70 фоизи миқдоридаги маблағ тугатилаётган суғурта (қайта суғурта) ташкилотлари суғурта (қайта суғурта) мажбуриятларининг ва қайтарилиши лозим бўлган суғурта мукофотларининг етишмаган қисмларини, шунингдек, уларга нисбатан банкротлик тартиботи қўлланилганда, молиялаштиришга йўналтирилади.
Календарь бадалининг қолган қисми ушбу Низомнинг 12-бандида кўрсатилган мақсадларга йўналтирилади.
11. Календарь бадали ставкаси ўзгарган тақдирда Агентлик суғурта ташкилотларига бу ҳақда кейинги тўлов муддатига қадар ўттиз кундан кечиктирмай хабар бериши лозим.
4-боб. Жамғарма маблағларидан фойдаланишнинг асосий йўналишлари
12. Қуйидагилар Жамғарма маблағларидан фойдаланишнинг асосий йўналишлари ҳисобланади:
суғурта бозорини ривожлантиришга, аҳолининг суғурта бозорига ишончини оширишга ва жамиятда суғурта маданиятини ривожлантиришга йўналтирилган комплекс чора-тадбирларни ташкил қилиш, шунингдек, халқаро даражадаги экспертлар ва мутахассисларни жалб қилган ҳолда суғурта фаолияти масалалари бўйича семинарлар, конференциялар ва форумларни ташкил этиш;
Агентлик раҳбарлари ва ходимларини ўқитиш, тайёрлаш, қайта тайёрлаш ва малакасини оширишни, шу жумладан хорижда ташкил қилиш;
миллий ва хорижий мутахассислар, халқаро ва хорижий ташкилотларни, шунингдек, консалтинг ташкилотларини жалб қилиш билан боғлиқ харажатларни қоплаш;
Агентлик ходимларини моддий рағбатлантириш, мукофотлаш, шу жумладан қўшимча тўловлар, устамалар тўлаш ва ижтимоий таъминлаш;
ходимларга моддий ёрдам кўрсатиш;
Агентлик ходимларига суғурта соҳасида ва (ёки) Агентлик тизимида кўп йиллик хизматлари учун мукофотлар тўлаш;
нархларни индексация қилишни ҳисобга олган ҳолда овқатланиш ва йўлкира харажатлари, шунингдек, мавсумий тусдаги қишлоқ хўжалиги маҳсулотларини харид қилишни қоплаш учун ходимларга қўшимча тўловлар белгилаш;
Агентликнинг жорий харажатларини молиялаштириш (автомобиллар, мебеллар, компьютерлар ва ташкилий техника, идора ашёлари, автомобиль эҳтиёт қисмлари ва ҳоказоларни харид қилиш);
Агентликнинг идора қилиш ва бошқарув функцияларини амалга ошириш билан боғлиқ сарфлар, шу жумладан, электрон маълумотлар базасини шакллантириш ва юритиш бўйича харажатларни қоплаш;
Агентлик фаолиятини яхшилашга йўналтирилган тадбирлар (видеороликлар, даврий нашрлар, брошюралар, буклетлар, китоблар, тўпламлар тайёрлаш, конференциялар, давра суҳбатлари, семинарлар ва ҳоказоларни ўтказиш);
Агентликнинг моддий-техник базасини мустаҳкамлаш;
делегациялар, меҳмонлар, шу жумладан, хорижий делегациялар, меҳмонларни қабул қилиш ва хизмат кўрсатиш билан боғлиқ вакиллик харажатлари;
Агентлик раҳбарлари ва ходимларининг, шу жумладан, хорижий мамлакатларга хизмат сафарлари харажатлари;
Агентликнинг коммунал-эксплуатация ва бошқа жорий харажатлари.
13. Агентлик белгиланган тартибда Ўзбекистон Республикаси Молия вазирлигига Жамғарма даромадлари ва харажатлари сметалари бажарилиши бўйича чораклик ва йиллик ҳисоботлар тақдим этади.
14. Ушбу Низомда назарда тутилмаган мақсадларда Жамғарма ҳисобварағидан пул ўтказиш ва маблағларни вақтинчалик олиш тақиқланади.