Reja: Til –ijtimoiy hodisa

1. 
   MA’RUZA. Til ijtimoiy, doim o'zgarib, rivojlanib turuvchi hodisadir. Milliy va adabiy til.
   

Reja:
1.Til –ijtimoiy hodisa.
2.Tilshunoslik fani haqida umumiy ma’lumot.
3.Milliy til va adabiy til.
4. Tillarning tasnifi. Tilshunoslik bo’limlari.


Tayanch so’z va iboralar: tilshunoslik, lingvistika,tilshunoslik fani bo’limlari, umumiy tilshunoslik, xususiy tilshunoslik, nazariy tilshunoslik, tillarning tasnifi, tilshunoslik bo’limlari.

Ma’lumki, hozirgi zamon fanlari tizimi quyidagi asosiy yo‘nalishlardan tarkib topgan:

1. Tabiiy fanlar.
2. Texnika fanlari.
3. Ijtimoiy-gumanitar fanlar.
4. Matematika fanlari.¹
Tilshunoslik fani kishilar tili haqidagi fan sifatida ijtimoiy-gumanitar fanlar guruhiga kiradi. “Tilshunoslik til haqidagi, uning ijtimoiy tabiati, vazifasi, ichki tuzilishi, tasnifi haqidagi; muayyan tillarning ish ko‘rish (faoliyat) qonunlari va tarixiy taraqqiyoti haqidagi fan” ². Tilshunoslik fani hozirgi zamon fanining barcha asosiy turlari bilan bog‘liq.
Tilshunoslik – ko‘p qirrali fan. U fan sifatida umumiy va xususiy, nazariy va amaliy tilshunoslikka ajratiladi.
Umumiy tilshunoslik barcha tillar bo‘yicha to‘plangan ma’lumotlarni umumlashtiradi va turli tillarga tatbiq etiladigan nazariyani yaratadi. Umumiy tilshunoslikning maqsadi: 1) tilning tabiatini, mohiyatini aniqlash; 2) til haqidagi fanning sathlarini va ularni o‘rganuvchi sohalarni belgilash; 3) tillarning tasnifini yaratish; 4) lingvistik tahlil metodikasini ishlab chiqish va boshqalar.
Xususiy tilshunoslik – alohida, ayrim til haqidagi fan; jumladan, o‘zbek tilshunosligi - o‘zbek tili haqidagi fan, qozoq tilshunosligi - qozoq tili haqidagi fan, rus tilshunosligi – rus tili haqidagi fan va h.k.
O‘z-o‘zidan ayonki, har bir xususiy tilshunoslik ma’lum bir konkret tilga xos bo‘lgan ma’lumotlarni o‘z ichiga oladi.