Reja: Hújdan erkinligi túsinigi. Xalıqaralıq normativ hújjetlerde hújdan erkinligi

Qarsı gu’res strategiyası. Zamanago’y ekstremizm ha’m terrorizmge qarsı gu’res ma’mleketlerdin’ ba’rha’ itibarın, onın’ aldın alıw ha’m saplastırıwg’a qaratılg’an ko’p qırlı siyasattı a’melge asırıwda sabırlılıq ha’m turaqlılıqtı talap etedi. Ken’ tarmaqlang’an terrorizmge qarsı gu’reste ku’sh isletpegen ma’mleketler a’zzilenip, o’z xalqın, ma’mleketin, tınıshlıg’ın ha’m turaqlı rawajlanıwın qa’wip astında qaldıradı.
Ekstremizm ha’m terrorizm bir-birine baylanıslı bolg’an birden-bir protsesstin’ izbe-iz rawajlanatug’ın basqıshları bolıp esaplanadı. Solay eken, terrorizm global da’rejege ko’terilgen ha’zirgi sharayatta ma’mleket o’zinin’ ishki ha’m sırtqı siyasatında og’an qarsı gu’res jirgiziwde ishki ha’m sırtqı faktorlardın’ ta’sirin esapqa alg’an halda ten’ salmaqlı strategiyanı islep shıg’ıwı kerek.
O’zbekstan Respublikası o’z rawajlanıwının’ o’zine ta’n ta’replerin, elege shekem terrorizm, narkobiznes, qural-jaraq sawdası sıyaqlı bir qatar qa’wipler bolıp turg’an Oraylıq Aziyadag’ı ku’shlerdin’ salıstırma salmag’ın esapqa alıp islep shıqqan ishki ha’m sırtqı siyasatı ayırıqsha a’hmiyetke iye.
Ekstremizm ha’m terrorizmge qarsı gu’restin’ usı strategiyasında elimizdin’ xalıq aralıq birge islesiw bag’darlamalarında, ma’mleketlerdin’ terrorizmge qarsı gu’restegi ha’reketlerin birlestiriwde aktiv qatnasıwın ta’miyinlew maqsetleri sa’wlelengen.
Bul tarawda o’zbek sırtqı siyasatının’ negizin o’z ku’shlerin ha’zirgi da’wirdin’ tiykarg’ı qa’wpine qarsı gu’reske bag’darlawg’a tayar bolg’an barlıq ma’mleketler menen aktiv birge islesiw quraydı. Usı jerde O’zbekstannın’ is ju’zinde aymaqta ha’m pu’tkil du’nya ju’zinde qa’wipsizlikti ta’miyinlewge qaratılg’an barlıq xalıq aralıq ba»darlamalarda ha’m eki ta’repleme birge islesiw bag’darlamalarında aktiv qatnasıp atırg’anın atap o’tiw za’ru’r.
Sonday-aq, O’zbekstan ma’mleketinin’ turaqlı rawajlanıwdı ha’m qa’wipsizlikti ta’miyinlewge qaratılg’an ishki siyasatı da ekstremizmnin’ payda bolıwı ha’m rawajlanıwı ja’ne ekstremizmnen terrorizmnin’ kelip shıg’ıwın sapastırıwg’a qaratılg’an aktiv strategiyası bolıp esaplanadı. Onda ekstremizmge qarsı gu’res arqalı bunday du’zilmeler quramında jetilisiwi mu’mkin bolg’an terrorshılar ha’reketinin’ aldın alıwg’a umtılıw bayan etilgenin ko’riw mu’mkin.
Bu’gingi ku’nde o’zbek ma’mleketi ta’repinen siyasiy, ekonomikalıq, sotsiallıq ha’m basqa da tarawlarda a’melge asırılıp atırg’an ken’ ko’lemli reformalar usı gu’res strategiyasının’ tiykarg’ı mazmunın quraydı.
Bazar ekonomikasına tiykarlang’an puqaralıq ja’miyetin qurıw, ekonomika, awıl xojalıg’ı, ta’lim-ta’rbiya, atap aytqanda, orta arnawlı ta’lim sisteması, densawlıqtı saqlaw, sport ha’m basqa tarawlardag’ı ken’ ko’lemli unamlı o’zgeriser usı strategiyanın’ quram bo’legi, Oraylıq Aziya aymag’ındag’ı jag’daydı belgilep beretug’ın, ma’mlekettegi turaqlılıq ha’m rawajlanıwdı ta’miyinlewge xızmet etetug’ın ilajlar sisteması bolıp esaplanadı. Ku’shli ekonomikag’a iye O’zbekstannın’ turaqlılıg’ı pu’tkil aymaqtın’ turaqlılıg’ın bildiredi.
Bul aqılg’a muwapıq ten’ salmaqlılıqqa tiykarlang’an ko’p qırlı ha’m ha’r tu’rli da’rejedegi strategiyada ma’nawiyat ha’m ideologiyalıq ta’rbiya ayırıqsha orın iyeleydi.
Qa’niygeler ekstremizmnin’ payda bolıwı ha’m rawajlanıwına sebep bolg’an faktorlar ishinde ideologiyalıq boslıqtın’ ta’sirin ha’m qa’diriyatlar maqsetlerindegi turaqsızlıqta ko’rinetug’ın ayırmashılıqlardı ayırıqsha ajıratıp ko’rsetedi. İdeologiyalıq boslıq ko’binese adamlarda ja’miyettegi bir jag’daydı, ja’miyetlik ortalıqtı nadurıs tu’siniwge, onın’ erkin basqa adamg’a boysındırıw ha’m ko’z-qarasında agressivlikti qa’liplestiriwge xızmet etetug’ın zıyanlı ideyalar menen toltırıwına negiz jaratadı. «Zombilestiriw» dep atalatug’ın bul texnologiya jaqsı qa’liplespegen ruwxıylıq, bosan’ erk-ıqrar ha’m zıyanlı umtılıslar ortalıg’ında g’ana ta’sir ku’shine iye boladı.
Sonın’ ushın da, O’zbekstan ekstremizmge qarsı gu’reste, onın’ payda bolıwı ha’m rawajlanıwın saplastırıw islerinde ideyalıq ta’rbiya, atap aytqanda, ma’mleket jaslarında joqarı ruwxıylıqtı qa’liplestiriw ma’selelerine ayırıqsha itibar bermekte. Sebebi bunday jandasıwda ulıwma insanıy ha’m milliy qa’diriyatlarg’a, milliy o’zlikti tiklew ha’m g’a’rezsizliktin’ mazmunın bayıtıwg’a tiykarlang’an milliy g’a’rezsizlik ideyası, ma’nawiyat ha’m ag’artıwshılıq durıs qa’liplestirilgen sana-sezim ekstremizm ha’m terrorizmge qarsı gu’restin’ ja’ne ja’miyettin’ turaqlı rawajlanıwın ta’miyinlewdin’ en’ a’hmiyetli sisteması sıpatında ju’zege shıg’adı.