Referat mavzu: O‘zbekistonda yoshlarning ijtimoiy faolligini oshirish masalalari Tayyorladi

2. Yoshlarni davlat xizmatiga jalb qilish – taraqqiyot asosi sifatida.


Mustaqillikka erishganimizdan buyon yoshlarni har tomonlama rivojlantirish va ularning jamiyatning barcha sohalarida ishtirok etish masalasi O‘zbekiston davlat siyosatining diqqat markazida qoldi.
So‘nggi yillarda yoshlarga oid davlat siyosatini tubdan isloh qilish va yangi bosqichga ko‘tarish borasida bir qator ijobiy tendensiyalarga erishildi. Jumladan, O‘zbekiston Respublikasining 2016 yil 14 sentyabrdagi «Yoshlarga oid davlat siyosati to‘g‘risida»gi qonuni qabul qilindi. Mamlakatimizda bandlik, huquq, siyosat, fan va ta'lim, madaniyat va sport, sog‘liqni saqlash, davlat tashkilotlari va jamoat institutlari bilan o‘zaro aloqalar sohasida yoshlar siyosatini amalga oshirish bo‘yicha kompleks vazifalarni hal qilishga qaratilgan keng ko‘lamli hamda tizimli ishlar olib borilmoqda. Barcha hokimiyat va idoralarda, mahallalarda yoshlar masalalari bo‘yicha rais o‘rinbosarining shtat birligi joriy etildi.
Chuqur bilim va malakaga ega raqobatbardosh kadrlarni tayyorlash maqsadida mamlakatimizdagi oliy o‘quv yurtlari soni 127 taga yetkazildi, 26 ta xorijiy universitetlarning filiallari ochildi. O‘tgan 5 yil ichida oliy o‘quv yurtlariga qabul kvotalari uch barobar oshdi, bu yil 182 ming yosh talaba bo‘lishi mumkin bo‘ladi. Shunday qilib, oliy ma'lumotli yoshlarning umumiy qamrovi 28 % foizga yetadi. To‘rt yil oldin bu ko‘rsatkich atiga 9 foiz edi.
Shu bilan birga, global dunyodagi o‘zgarishlar bilan bog‘liq bo‘lgan yangi muammolarning o‘sish tendensiyasi kuzatilmoqda, ular tizimli yangilanishni, yoshlarga oid davlat siyosatining vazifalari va mexanizmlarini ishlab chiqishni talab qiladi.
O‘zbekiston Respublikasi Prezidenti Shavkat Mirziyoevning 2020 yil 29 dekabrdagi Oliy Majlisga qilgan Murojaatnomasida 2021 yilning O‘zbekistonda "Yoshlarni qo‘llab-quvvatlash va aholi salomatligini mustahkamlash yili" deb e'lon qilinishi hamda 2021 yil 30 iyun' Yoshlar kuniga bag‘ishlangan tantanali marosimdagi ma'ruzalari mamlakat rahbariyatining sog‘lom avlodning barkamol voyaga yetishini ta'minlashga, yoshlarni qo‘llab-quvvatlashga va ularning o‘zini anglashiga, sharoit yaratishga bo‘lgan munosabatini yaqqol namoyish etadi.
Shubhasiz, Yangi O‘zbekistonning asosiy maqsadi, yoshlarni har tomonlama qo‘llab -quvvatlash va tarbiyalash, ularning ijtimoiy faolligini oshirish, yosh iste'dodlarning kuchli salohiyatini to‘la-to‘kis amalga oshirish uchun zarur shart-sharoitlarni yaratishdir.
Biroq, davlat boshqaruvi tizimiga zamonaviy yondashuvlarni qo‘llamasdan turib mamlakatimizda Uchinchi Renessans poydevorini shakllantirib bo‘lmaydi. Shuningdek, davlat organlari va tashkilotlari xodimlari rahbariyat ko‘rsatmalarini bajarish samaradorligini belgilovchi, mamlakatimiz oldiga qo‘ygan maqsad va vazifalarini amalga oshirishda tashabbus ko‘rsatuvchi asosiy omillardan biridir.
Hozirgi raqamlashtirish davrida davlat organlari tomonidan ilg‘or qarashlar, yangicha g‘oyalar, faoliyatdagi yuqori samaradorlikka qiziqish bildirish bilan birga, mamlakatning ijtimoiy va siyosiy rivojlanishi jarayonlariga yosh tashabbuskor shaxslarni jalb etishni o‘z e'tiborlarini qaratishgan.