Qurilishni boshqarish

I.BOB. Xususiy uy-joy mulkdorlari shirkatlarining rivojlanish tarixi va vazifalari.

1. 
   Xususiy uy-joy mulkdorlari shirkatlarini tashkil etilish maqsadi va vazifalari.
   

Bugungi kunda uy-joy fondining asosiy qismining boshqaruvida ishtirok etayotgan xususiy uy-joy mulkdorlari shirkatlarining qisqa muddatlarda va asosan davlat hokimiyati organlari tashabbusiga ko‘ra joylarda tashkil etilishi, ularning boshqa davlatlardagi uy-joy fondi boshqaruvi tashkilotlaridan farqlanishiga olib keldi.

Shirkatlar tashkil etilishining ma’muriy usuli oldindan tushuntirilmaganligi, uy-joy mulkdorlariga shirkatlar o‘zlarining manfaatlari uchun tuzilgan tashkilot emas, balki yangi nom ostidagi sobiq JEK deb hisoblashlariga olib keldi. Buning oqibatida, ularning aksariyat qismi bugunga qadar o‘z uylaridagi umumiy mulkka nisbatan o‘z huquq va majburiyatlarini yaxshi bilmaydilar, o‘zlarining shirkatdagi amaliy rolini hamda uyga xizmat ko‘rsatish sifatiga ta’sir ko‘rsatish imkoniyatlarini to‘liq anglamaydilar.

Uy-joy fondini birgalikda boshqarish va uning saqlanishi, butligi va ta’mirlanishini ta’minlash, ko‘p kvartirali uydagi mulkdorlarning umumiy mulki (keyingi o‘rinlarda umumiy mulk deb ataladi) va yer uchastkasidan foydalanish shirkatni tashkil etishning ko‘zlangan maqsadi hisoblanadi.

Maqsad – xonadon mulkdorlarini ko‘p xonali turar-joy binosidagi umumiy mulkka nisbatan manfaatlarini muvofiqlashtirib, birgalikda qaror qilish uchun birlashtirishdan iborat.