Qurilish materiallari

Inden-kumaronli polimer kumaron, inden, stirol va ularning gomologlari kabi aromatik birikmalarni polimerizatsiyalab olinadi. U asosida loklar, pol uchun plitkalar tayyorlanadi.


11.3.3. Polikondensatsion polimerlar


Fenol-aldegidli polimerlar fenollar (fenol, rezortsin, krezol va boshq.) va aldegidlarni (formaldegid, furfurol, lignin va boshq.) polikondensatsiya reaksiyaiari natijasida olinadi. Fenol-formaldegid polimerlari yog'och, mato, qog'oz, shisha va mineral tolalar bilan yaxshi yopishgani uchun ular kukuni va to'ldirgichlari asosida kompozitsion pressmateriallar va issiqlik izolatsiyasi buyumlari tayyorlanadi. Ular yog'och-payrahali plitalar, qog'oz qatlamli plastiklar, shishaplastiklar, mineral paxta plitalari, suvga chidamli fanera va opalubkalar, yelimlar, bakelit loklari hamda polimer mastika, qorishma va betonlar tayyorlashda boglovchi sifatida ishlatiladi. Qattiq rezolli polimerlar asosida press-kukunlar va faolit, ular zaminida esa quvurlar, listlar, plitkalar, elektrotexnika buyumlari olinadi.
Karbamidli polimerlar karbamid va formaldegidning organik sintez usulida olinadi. Karbamidli polimerlar oqish-rangsiz, qovushqoq-oquvchan suyuqlik. pigmentlar qo'shib, istalgan rangga kiritiladi. U suvda istalgan nisbatda mineral kukun, mayda va yirik to'ldirgichlar bilan yaxshi aralashadi. Organik to'ldirgichlar (qipiq, payraha, qog'oz maydasi va shu kabilar) va yog'ochga katta kuch bilan yopishadi; nisbatan arzon va xomashyo zaxiralari yetadi.
U kuchsiz kislotalar, tuz eritmalari ta'sirida qotadi. Mo'rtligini kamaytirish uchun tarkibiga plastifikatorlar qo'shiladi.
Karbamid polimeri asosida yog'och va qog'oz yelimlari, mastika, pasta, qorishma va betonlar tayyorlanadi. Yog'och tolali va yog'och payrahali plitalar, yelimlangan konstruksiyalar olishda bog'lovchi sifatida ishlatiladi. Karbamid smolasi tarkibiga gaz hosil qiluvchi komponentlar kiritilib, yacheykali plastiklar, ko'pqatlamli va tolali plastiklar tayyorlanadi.