Qonuni aholi bandligi to‘G‘risida

53-modda. Tashkilotlardan bo‘shatilgan shaxslarga ishsizlik nafaqasi to‘lashning o‘ziga xos xususiyatlari
Ushbu Qonun 49-moddasining birinchi va ikkinchi qismlarida ko‘rsatilgan asoslar bo‘yicha tashkilotlardan bo‘shatilgan shaxslar uchun, agar ular mehnat shartnomasi bekor qilinganidan keyin o‘ttiz kalendar kun ichida ish qidirayotgan shaxslar sifatida mahalliy mehnat organlarida ro‘yxatdan o‘tgan bo‘lsa, belgilangan uch oylik muddat tugaganidan keyin birinchi kundan e’tiboran ishsizlik nafaqasi hisoblanadi.
Agar ushbu Qonun 49-moddasining birinchi va ikkinchi qismlarida ko‘rsatilgan asoslar bo‘yicha tashkilotdan bo‘shatilgan shaxs mehnat shartnomasi bekor qilinganidan keyin o‘ttiz kalendar kun ichida mahalliy mehnat organlarida ro‘yxatdan o‘tmagan, lekin unga uch oylik davr tugaganidan keyin mahalliy mehnat organi tomonidan maqbul keladigan ish berilmagan bo‘lsa, u ishsiz shaxs maqomiga ega bo‘ladi hamda unga mehnat shartnomasi bekor qilingan sanadan keyin kamida ikki oy muddat o‘tgach ishsizlik nafaqasi hisoblanadi. Ishdan bo‘shatilayotgan shaxs maqbul ishga doir ikkita taklifni rad etgan taqdirda, u ishsiz shaxs maqomiga ega bo‘lmaydi va o‘ttiz kalendar kundan so‘ng umumiy asoslarda ish qidirayotgan shaxs sifatida ro‘yxatga olinadi.
54-modda. Mahalliy mehnat organlarini ishsizlik nafaqasini to‘lashga ta’sir ko‘rsatadigan shartlar o‘zgarganligi to‘g‘risida xabardor qilish
Ishsizlik nafaqasini olayotgan ishsiz shaxslar mahalliy mehnat organini quyidagilar to‘g‘risida uch kunlik muddatdan kechiktirmay xabardor qilishi shart:
mustaqil ravishda ishga joylashganligi (mehnat shartnomasi tuzganligi);
fermer yoki dehqon xo‘jaligini yuritish uchun yer uchastkasini foydalanishga olganligi;
tadbirkorlik faoliyati yoki o‘zini o‘zi band qilgan shaxs sifatida boshqa har qanday faoliyat bilan shug‘ullanishdan daromad olayotganligi;
tijorat bankidan, mikromoliya tashkilotidan yoki lizing kompaniyasidan kredit yoki lizing olganligi;
kasbga tayyorlash, qayta tayyorlash yoki malaka oshirish kurslariga mustaqil ravishda (mahalliy mehnat organi vositachiligisiz) kirganligi;
Oldingi tahrirga qarang.
qonunchilikka muvofiq pensiya ta’minoti huquqiga ega bo‘lganligi (pensiya turidan qat’i nazar);
(54-modda birinchi qismining yettinchi xatboshisi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
harbiy majburiyatlarni bajarganligi va harbiy xizmatga tayyorgarlik bilan bog‘liq tadbirlarda ishtirok etganligi;
yashash joyi o‘zgarganligi;
ishsizlik nafaqasini to‘lash shartlari o‘zgarishiga sabab bo‘ladigan boshqa holatlar.
Mahalliy mehnat organlari ishsizlik nafaqasini to‘lash shartlari o‘zgarganligi to‘g‘risida “Yagona mehnat milliy tizimi” idoralararo dasturiy-apparat kompleksidan va idoralararo hamkorlikning boshqa shakllaridan foydalangan holda, mustaqil ravishda axborot olishga haqlidir.