Qarshi muhandislik

Ish joyini tashkil qilish.

Hozirgi paytda yangi texnologik jarayon, yangi mashina va uskunalar albatta “Mahsulot sifati va ergonomik ko‘rsatkichlar”da belgilangan talablarga javob berishi kerak. Ish joyida narsalarning joylashtirilishi, ularning shakli, rangi va boshqa qator omillar noto‘g‘ri joylashtirilsa ishchini charchatadi, to‘g‘ri joylashtirilganda esa aksincha, ish unumdorligini oshiradi.
Bunda ish joylarini tashkil qilish ham katta axamiyat kasb etadi: asboblar tugmalarining joylashtirilishi, rangi mashinaning balandligi va boshqa ishlab chiqarish sharoitlari shular jumlasidandir. Bular shunday joylashtirilishi lozimki,
ishchi ortiqcha xarakatsiz, o‘zini zo‘riq-tirmasdan ulardan osonlik bilan foydalansin.
Ish joyining balandligi ham muhim ahamiyat kasb etadi. Odatda u 1000– 1600 mm oraliqda olingani maqsadga muvofiqdir. Bundan tashqari ko‘zning imkoniyat doirasini ham hisobga olish kerak.

Bosim ostida ishlaydigan uskunalarning xavfsizlik shartlari.

Sanoat korxonalarida bosim ostida ishlaydigan, apparat, idish va quvurlar ko‘p ishlatiladi. Bular ko‘pincha portlash xavfini tug‘dirishi mumkin. Bunday portlashlarga zanglash natijasida uskuna devorlarining yemirilishi va mexanik pishiqligining yo‘qolishi, ayrim qismlarining qizib ketishi, biror qattiq jismning urilishi sabab bo‘lishi mumkin. Bundan tashqari portlovchi va yonuvchi moddalarga uchqun ta’sir qilishi natijasida ham portlash sodir bo‘lishi mumkin. Bunda yonish tezligi sekundiga yuzlab metrni tashkil qiladi.
Bosim ostida ishlaydigan idishlar qayta ta’mirlanib kavsharlangan bo‘lsa, bir joydan ikkinchi joyga ko‘chirilganda yoki uning xavfsiz ishlashiga javobgar shaxsning talabi bilan muddatidan ilgari texnik ko‘rik o‘tkaziladi. Gidravlik sinov esa har sakkiz yilda bir marta o‘tkaziladi. Ish harorati 2000 S gacha bo‘lgan idishlarning gidravlik sinovi, ularga suv yoki zaharsiz va portlamaydigan boshqa suyuqlik bilan qo‘shimcha bosim berish orqali o‘tkaziladi. Qo‘shimcha bosim idishning ish bosimiga bog‘liq bo‘lib, quyma idishlardan tashqari barcha idishlar uchun ish bosimidan 25-50 foiz katta bo‘ladi. Shunday bosim ostida (devorlarining qalinligi 50 mm gacha bo‘lgan idishlarda) 10 minut ushlab turiladi va biror sezilarli o‘zgarish bo‘lmasa, ya’ni choklardan ajralish, suyuqlik tomishi, tashqi devorlarining terlashi, qoldiq deformatsiyalar ko‘rinmasa idishlar gidravlik sinovdan o‘tgan hisoblanadi.
Bosim ostida ishlaydigan uskunalar normal texnologik rejimda va xavfsiz ishlashini ta’minlash uchun quyidagi nazorat-o‘lchov asboblari va ehtiyot uskunalari bilan ta’minlangan bo‘lishi kerak: ulardagi suyuqlik yoki gazning bosimini o‘lchash uchun va doimo nazorat qilib turish uchun manometr, haroratni nazorat qilib turish uchun termometr, bosim oshib ketgan taqdirda portlashni oldini olish uchun saqlagich, idishda bir vaqtning o‘zida gaz va suyuqlik bo‘lgan taqdirda suyuqlikning ko‘p yoki ozligini ko‘rsatuvchi asbob, idish ichidagi moddani butunlay chiqarib tashlash imkonini beruvchi moslama, agar idish ichida kondensat to‘plansa, uni chiqarib tashlash imkonini beruvchi moslama.
Quvurlarning ishonchliligini ta’minlash uchun ularning issiqdan uzayishini hisobga olish kerak. Buning uchun ularning burilgan joylari ravon va silliq qilib yasaladi hamda kondensator halqalari va shunga o‘xshash elementlar kiritiladi. Issiqlik deformatsiyalarini bir tekis taqsimlash maqsadida, ularni ayrim uchastkalarga bo‘lib chiqib, issiqdan uzayishga imkon qoldirib, oxirgi nuqtalarini tayanchlarga mustaxkamlanadi.