Процессуал ҳужжатларни расмийлаштириш фанидан 2-мавзу: «Фукаролик ишлари буйича судларга такдим этиладиган даъво аризалари ва суд карорлари»

Аризани ёзиш тартиби, унинг мазмунига қўйиладиган талаблар
Фуқаролик процессуал қонун талабларига кўра судда фуқаролик ишлари ёзма шаклда, шу жумладан ахборот тизими орқали электрон шаклда ариза бериш йўли билан қўзғатилади.
Судга ариза топширишда Фуқаролик процессуал кодексининг 149-моддасида белгиланган аризанинг мазмунига қўйилган талабларга риоя қилиниши лозим.
Судга топширилаётган ариза даъвогар ёки унинг вакили томонидан имзоланади. Агар ариза вакил томонидан берилган бўлса, аризага ишончнома ёки унинг ваколатини тасдиқловчи бошқа ҳужжат илова қилиниши лозим.
Бошқа шахсларнинг ҳуқуқлари ва қонун билан қўриқланадиган манфаатларини ҳимоя қилиш мақсадида прокурор, давлат бошқаруви органлари, ташкилотлар ёки айрим фуқаролар томонидан бериладиган аризаларда, шу моддада санаб ўтилган маълумотлардан ташқари, ариза кимнинг манфаатини кўзлаб берилган бўлса, ўша шахснинг номи (фамилияси, исми ва отасининг исми) ва манзили кўрсатилиши лозим.
Фуқаролик процессуал қонунчилигининг асосий тамойилларидан бири бу ишни кўришнинг бевоситалиги, яъни суд мажлисини бевосита тарафлар иштирокида кўришдир.
Процессуал қонунчилик талаблари ишни тарафларни суд мажлисининг жойи ва вақти ҳақида хабардор қилган ҳолда кўриш лозимлигини назарда тутади. Шу сабабли суд тарафлар билан боғланиш имконига эга бўлиши мумкин бўлган барча зарурий маълумотлар, хусусан, аризачининг, агарда аризачи бундай маълумотга эга бўлса қолган тарафларнинг ҳам телефон рақамлари, мавжуд бўлса электрон манзиллари (e-mail) аризада кўрсатилиши мақсадга мувофиқдир
ФУҚАРОЛИК ПРОЦЕССУАЛ КОДЕКСИНИНГ ТЕГИШЛИ МОДДАЛАРИГА КЎРА АРИЗАДА ҚУЙИДАГИЛАР КЎРСАТИЛИШИ ЛОЗИМ;
1) ариза берилаётган суднинг номи;
2) даъвогарнинг номи (фамилияси, исми ва отасининг исми) ва яшаш жойи, агар даъвогар ташкилот бўлса, унинг номи ва қаерда жойлашганлиги, шунингдек, агар ариза вакил томонидан берилаётган бўлса, вакилнинг номи (фамилияси, исми ва отасининг исми) ва манзили;
3) жавобгарнинг номи (фамилияси, исми ва отасининг исми), яшаш жойи ёки агар жавобгар ташкилот бўлса, унинг номи ва қаерда жойлашганлиги;
4) даъвогарнинг талаби;
5) агар даъвони баҳолаш лозим бўлса, унинг баҳоси;
6) даъвогар ўзининг талабларига асос қилиб кўрсатаётган ҳолатлар ва бу ҳолатларни тасдиқлайдиган далиллар;
7) аризага илова қилинган ҳужжатларнинг рўйхати.