Prezident yoshlar maʼnaviyatini yuksaltirish, ularning boʻsh vaqtini mazmunli tashkil etish boʻyicha muhim vazifalarni belgilab berdi

Bundan tashqari, Xalq taʼlimi vazirligi tomonidan, jismoniy tarbiya va sportni yana-da ommaviylashtirish maqsadida, joriy yilning fevral-mart oylarida “5 tashabbus Navroʻzda” festivalini oʻtkazish belgilandi.
Ushbu festival doirasida “Bolalar spartakiadasi” milliy va harakatli sport oʻyinlari oʻtkazilishi koʻzda tutilgan boʻlib, unga asosan hududlarda jami 370 ming nafardan ortiq oʻquvchilarning milliy va harakatli oʻyinlar boʻyicha bellashishi rejalashtirilgan.
Jismoniy tarbiya va sport vazirligi tomonidan tashkil etilayotgan “Sport doim yutadi” musobaqasi chekish, alkogol mahsulotlari va giyohvandlik moddalarning isteʼmol qilinishiga qarshi kurashish maqsadida sportning futbol, shaxmat-shashka, basketbol, stol tennisi, armrestling turlari boʻyicha ommaviy sport musobaqalari oʻtkazishga qaratilgan.
Loyiha doirasida 2019-yilning dekabr oyi va 2020-yilning yanvar oyi davomida respublikamiz miqyosida 3765 ta sport musobaqalari va ommaviy-sport tadbirlari oʻtkazildi. Mazkur musobaqalarda 1 232 105 nafar ishtirokchilar qatnashdi. Jumladan, 536 167 nafarini xotin-qizlar tashkil etdi. Musobaqalarda gʻoliblikni qoʻlga kiritgan ishtirokchilar Jismoniy tarbiya va sport vazirligi, hamkor tashkilotlar va homiylar tomonidan diplom, medal, qimmatbaho sovgʻalar bilan taqdirlandi. Oʻtkazilgan sport musobaqalari teleradiokanallarda, hududiy boshqarmalarning rasmiy veb-sayti, vazirlik veb-sayti hamda ijtimoiy tarmoqlar orqali yoritib borildi.
Navbatdagi loyiha – “Sogʻlom turmush tarzini targʻib qilish boʻyicha tadbirlar oʻtkazish” boʻyicha sport va piyoda sayohatlari, marafonlar tashkil etiladi. Hududlarda tashkil etilgan Ishchi guruhlar tomonidan aholining keng qatlami, tashkilot va muassasalarning ishchi xodimlari oʻrtasida sogʻlom turmush tarzini targʻib qilish, ularning sportga qiziqishini oshirish uchun hududiy hokimliklarining manzilli dasturi ishlab chiqilgan.
2019-yilning dekabr oyi va 2020-yilning yanvar oyi davomida maktabgacha taʼlim muassasalari tarbiyalanuvchilari, umumtaʼlim maktab oʻquvchilari, kasb-hunar taʼlimi, oliy taʼlim muassasalari talabalari, tibbiyot xodimlari oʻrtasida “Biz sogʻlom turmush tarzi tarafdorimiz” shiori ostida 610 ga yaqin marafon va 815 dan ziyod ommaviy piyoda yurish sayrlari oʻtkazildi.
Mazkur sport tadbirlarida 2 800 423 nafar ishtirokchilar qatnashdi. Shulardan 1 216 291 nafari - xotin-qizlarni tashkil etdi.