Prezident yoshlar maʼnaviyatini yuksaltirish, ularning boʻsh vaqtini mazmunli tashkil etish boʻyicha muhim vazifalarni belgilab berdi

OʻZBEKISTON RESPUBLIKASI PREZIDENTI ILGARI SURGAN 5 TASHABBUSNING II YOʻNALISHI – “YOSHLARNI JISMONIY CHINIQTIRISH VA SPORT SOHASIDA OʻZ QOBILIYATINI NAMOYON QILISHLARI UCHUN ZARUR SHAROITLAR YARATIB BERISH” HAYOTGA KENG TATBIQ ETILMOQDA

Mamlakatimiz umumtaʼlim maktablarida Prezidentimiz Sh.M.Mirziyoyev tomonidan yoshlar bilan ishlashni samarali tashkil etishda madaniyat, sanʼat, sport, axborot-texnologiyalari, kitob oʻqishga qiziqishni oshirish boʻyicha 5 ta muhim tashabbus ilgari surilgan edi.
II yoʻnalish doirasida boshqa loyihalar bilan bir qatorda “Quvnoq startlar”, “Sport doim yutadi” musobaqasi, sogʻlom turmush tarzini targʻib qilish boʻyicha tadbirlar oʻtkazish, mashhur sportchilar bilan maktab oʻquvchilarining uchrashuvlarini tashkil etish loyihalari amalga oshirilmoqda.
Loyihalar doirasida respublikaning barcha hududlaridagi millionlab yoshlar orasida sport va sogʻlom turmush tarzini ommalashtirish hamda rivojlantirish boʻyicha tadbirlar oʻtkazilmoqda.
Jumladan, “Quvnoq startlar” musobaqasi doirasida Xalq taʼlimi vazirligi tomonidan oʻquv dastur ishlab chiqilgan boʻlib, televizion koʻrsatuvlarda respublika umumtaʼlim maktab jamoalari oʻrtasida musobaqalar oʻtkazildi. Oʻyinlar ommabop, qiziqarli va koʻngilochar boʻlib, har qanday yoshdagi oʻsmirlar uchun moʻljallangan.
Musobaqa 2019-yilning noyabr-dekabr oylari va joriy yilning yanvar-fevral oylarida Respublika miqyosida barcha tuman(shahar)lardagi umumtaʼlim maktablarida oʻtkazilishi belgilangan.
Ushbu musobaqaning birinchi (maktab) bosqichi 2019-yilning noyabr va dekabr oylarida oʻtkazildi. Unda 1 906 632 nafar oʻquvchilar ishtirok etdi. Shundan 953 316 nafari qizlarni tashkil etdi.
Musobaqaning ikkinchi (tuman/shahar) bosqichi joriy yilning 
yanvar - fevral oylarida tashkil etildi. Bugunga qadar 7 ta hududda (Jizzax, Navoiy, Sirdaryo, Surxondaryo, Toshkent, Fargʻona viloyatlari va Toshkent shahri) mazkur musobaqalarning tuman (shahar) bosqichi 5 600 nafar oʻquvchilar (shundan 2 759 nafari qizlar) ishtirokida oʻtkazilib, gʻoliblar aniqlandi.
Uchinchi bosqich barcha hududlarda joriy yilning mart oyida oʻtkaziladi.
Taʼkidlash lozimki, 5 tashabbus amaliyoti joriy etilgan 42 ta tuman (shahar)lardagi 183 ta umumtaʼlim muassasalarida, 2019-yilning oktyabr oyida noanʼanaviy tarzda 5-8-sinf oʻquvchilari oʻrtasida “Quvnoq startlar” sport musobaqalari oʻtkazildi. Ushbu musobaqalarga jami 122 074 nafar (shundan 61 195 nafar qizlar) oʻquvchilar jalb etilib, 1 806 nafari (shundan 903 nafari qizlar) gʻoliblikni qoʻlga kiritdi.