Полвонов, Ж. Ражабов, А. Одилов ўзбекистон тарихи

Комил инсонни тарбиялашда тарихнинг роли
«Маънавиятини тиклаши, туғилиб ўсган юртида ўзини бошқалардан кам сезмай, бошини баланд кўтариб юриши учун инсонга, албатта тарихий хотира керак. Тарихий хотираси бор инсон-иродали инсон. Ким бўлишидан қатъий назар, жамиятнинг ҳар бир аъзоси ўз ўтмишини яхши билса, бундай инсонларни йўлдан уриш, ҳар хил ақидалар таъсирига олиш мумкин эмас. Тарих сабоқлари инсонни ҳушёрликка ўргатади, иродасини мустаҳкамлайди». Республикамиз Президенти Ислом Каримов қаламига мансуб ушбу сўзлар комил инсонни тарбиялашда Ўзбекистон тарихини холисона ва ҳаққоний ўрганиш нақадар муҳим эканлигининг далилидир.
Ўар томонлама етук, комил инсонни тарбиялашда Ўзбекистон тарихининг ўрни каттадир. Комил инсон тушунчасига Юртбошимиз яна шундай таъриф берадилар: «Комил инсон деганда биз аввало онги юксак, мустақил фикрлай оладиган, хулқ-атвори билан ўзгаларга ибрат бўладиган билимли, маърифатли кишиларни тушунамиз. Онгли, билимли одамни олди-қочди гаплар билан алдаб бўлмайди, у ҳар бир нарсани ақл-мантиқ тарозисига солиб кўради, ўз фикр-ўйи, хулосасини мантиқ асосида кўрган киши етук одам бўлади».
Бугунги кунда халқнинг, айниқса, ёшларнинг маънавий руҳини мустаҳкамлаш ва ривожлантириш борасидаги ишлар давлатнинг олдида турган муҳим вазифаларидан бири бўлиб қолмоқда. Маънавият, маънавий баркамоллик шундайгина киши руҳига кириб қолмайди. Унга ҳар куни ва ҳар соатда тинмай сабр-бардош билан меҳнат қилиш орқали етишиш мумкин. Бу хайрли ишда Ўзбекистон тарихини ўрганишнинг ўрни беқиёсдир.
Ўтмиш шундай бой тарихий тажриба манбаидирки, одамлар унда ўрганадилар, тажрибага эга бўладилар ва ундан илҳом оладилар. Ҳозирги кунда тарихни билиш кундалик назарий ва амалий вазифалар ечимини топишда зарурий восита ҳисобланади.
Таянч тушунчалар
Фаннинг предмети ва долзарб муаммолари, холислик, илмийлик, тарихийлик, диалектик услуб, моддий ва ёзма манбалар.
Мустақил иш мавзулари
Ўзбекистон тарихини ўрганишда моддий ва ёзма манбаларнинг аҳамияти.
И.А. Каримовнинг «Тарихий хотирасиз келажак йўқ» асари Ўзбекистон тарихидаги долзарб муаммоларни ўрганиш учун муҳим йўлланма.
Фуқароларимиз онгига миллий истиқлол ва миллий мафкура ғояларини сингдиришда тарихнинг ўрни.