Pán: Ádebiyat Klass: 6 Waqtı

Aral qushaǵında
(romannan úzindi)
Usıdan bir saat ilgeri Bekimbetti izlegenler onı kabinetinen emes, uchastkalardan tabatuǵın edi. Minekey, onıń dem almaǵanına eki kúnniń júzi. Ol hár uchastkaǵa barıp jetispey atırǵan nárseni anıqladı da, sonıń menen birge joba orınlawdıń birden-bir tuwrı jolı tuwralı kórsetpeler berip, onıń orınlanıwın tekseretuǵının da qattı eskertti. Onıń usınǵan jolı balıqtıń bar jerin ilgeri anıqlap, sonnan keyin balıqshılardı uchastkalarǵa bóliw. Soqır táwekelge salıp balıqshılardı bir uchastkadan ekinshi uchastkaǵa kóshirip atırǵan brigadirler de az emes edi. Bunday sátsizlikke ushıramaw ushın Bekimbettiń teńizde júzip, hárbir brigadirden esap alıp otırıwına tuwrı keldi. Ol búgin birinshi, úshinshi brigadalardıń jumısın tekserip, sol kúni balıqshılar menen túnep te shıqtı.Erteńine ol basqa uchastkalardı aralawǵa shıqtı. Jolda Narımbetke ushırastı. Ǵarrını ıza qısıp-aq tur eken. Túsin hesh ózgertpesten júrgenligin hám nege ashınatuǵının ayttı:
— Bekimbet-aw, — dedi ol, — mına motordıń kapitanı barıp turǵan qırsıqtıń ózi eken. Sonıń qırsıǵınan qolǵa túsken balıqtan ayrılıp qalayın dep turǵanımız mınaw.Narımbettiń ashıwı kóziniń naq aldına kelip tireledi. Bunı Bekimbet te sezip, onıń ashıwın basıw ushın áweli túsinip alǵısı keldi.
— Qanday balıqtı aytasız? Kapitan sonshama nege qasarısadı?
Ǵarrı juwap berdi. Ol búgin ǵana alınǵan barlawda Mayshı jol dan sazan shıqqanı tuwralı xabar alınǵanlıǵın ayttı. Sóziniń aqırında ol:
— Kórip tursań ǵoy, eki kún udayı jel ıqtan esti, qopanıń suwı tartılıp, shalańı betine shıǵıp qaldı. Bunday máhálde sazannıń tereńge qashatuǵını anıq. Sonı qashırmay uslap qalıw kerek edi.
Bul xabardı házir ǵana esitken Bekimbet jaqsı xabar ekenligine kózi jańa jetip, Narımbetke motobottıń ne ushın kerekligin soradı.
— Bekimbet-ay, aytarıń bar ma? Biz usı jerde kem degende on bes kemeshi barmız. Solardı izine tirkep tezirek jetkeriwdiń ǵamına kirisse eken? Biz ol jerde toy toylawǵa baratırǵanımız joq. Kúppá-kúndiz qıpqızıl qalash deydi. Bara sala kirisip kete bermeymiz be? Sonı aytsam, mına qırsıq tıńlamaydı. Ókpesin qolına alıp ushıp júrgen bir bále.
Durıs,—dedi Bekimbet, — sol jelókpe kapitanǵa. Ol kapitandı qasına shaqırıp aldı.
— Sen, — dedi oǵan — usı jerdegi on bes awshını bir saattıń ishinde Mayshı jol uchastkasına jetkeretuǵın bol. Jol-jónekey Bel qamıs qa da jolıǵıp, ondaǵı balıqshılardı da izińe tirkep al. Esittiń ǵoy.
— Qaysıńızǵa baǵınayın,—dedi kapitan — orınbasarıń barma, ishtegi balıq heshqayda qashpaydı deydi. Al, sen...
— Awa, men bar dep buyıraman,— dedi Bekimbet sózin bólip.
— Aytqandı esittiń be?
— Esitpey ne? Biraq bir saat azlıq etedi...
— Men onıń da bes minutın qısqartaman,— dedi Bekimbet.
— Házir bes minuttıń ózinde bir keme sazan qolımızǵa kireyin dep tur. Sonı oylaǵan qırq bes minuttan da qısqartıwdıń jolın oylap tap. Narımbetke qaradı.
— Kapitan qırq bes minutta jetkermese, maǵan xabarlarsań. Saat kimde bar?
— Me n d e ! — dep Azat ushıp turdı.
— Qırq bes minut umıtıp qalma?
— Ayda, kapitan!— dedi Azat dawıslap.—Tuwrı Mayshı jolǵa!