Pán: Ádebiyat Klass: 6 Waqtı

Kórkem shıǵarmanıń tili
Sóylewdiń hám jazıwdıń belgili bir ólshemlerine, qaǵıydalarına ie bolǵan, ulıwma xalıqqa, onıń barlıq qatlamlarına ortaq bolǵan xalıqtıń jámietlik, ruwxıy, mádeniy turmısına xızmet ete alatuǵın til. Ilimmádeniyat hám kórkem ádebiyat shıǵarmaları ádebiy tilde jazıladı. Hárbir xalıqtıń tili dialektlerge bóliniwi hám olar leksikalıq, fonetikalıq jaqtan ózgesheleniwi múmkin. Dialektler ulıwma xalıqlıq tildiń normalarına úylespeydi, sonlıqtan olar jergilikli áhmietke ie boladı. Qatnas quralı bolǵan til mádeniyat rawajlanǵan sayın bir dialekt yamasa qáwimlik til sheńberinen shıǵıp ulıwma ádebiy sóylew hám jazıw tiline birlesedi. Ayırım jaǵdaylarda qáwimlik tiller yamasa jergilikli áhmietke ie dialektler de ádebiy tilge aylanıwı múmkin. Mısalı, ertede VII—XVII ásirlerde kópshilik túrkiy xalıqlar hám qáwimler ushın ortaq bir ádebiy til — túrkiy til xızmet etken. Sońınan XVIII—XX ásirlerde tariyxıy-mádeniy rawajlanıwdıń nátiyjesinde kópshilik túrkiy xalıqlar ózleriniń sóylew tili tiykarında ulıwma túrkiy ádebiy tilinen bólek ádebiy til dúzdi. Ózbek, qaraqalpaq, qazaq, túrkmen, qırǵız hám taǵı basqa túrkiy xalıqlardıń ádebiy tilleri usı joqarıda aytılǵan rawajlanıwdıń barısında qáliplesti.Kórkem ádebiyattıń tili — ulıwma ádebiy tildiń bir túri. Ol tek xabarlaw quralı bolıp qalmastan, adamlarǵa ruwxıy azıq, estetikalıq zawıq baǵıshlaydı.
Til — jazıwshınıń oy-pikirleri menen seziminiń sırtqa shıqqan kórinisi. Jazıwshı ózine kerekli sózdi aldı burın izlemeydi, al sóz oy menen pikirge sezimge baylanıslı dóreydi. Ol arqalı jazıwshınıń aytayın degeni kórkem obrazǵa aylanadı. Ádebiyat sóz arqalı adamlardıń janlı obrazların dóretedi, adamlardıń qarım-qatnasların kóz aldımızǵa elesletedi.