Pensiya ishi darslik i-qism toshkent-2020 Rustamov D. R., Tursunov J. P., Beknazarov Z. E

8.3. Pensiya jamg‘armasining xarajatlari tavsifi, tarkibi va yo‘nalishlari
Ma’lumki, O‘zbekiston Respublikasi Vazirlar Mahkamasining 2010 yil 19 fevraldagi 30-sonli qarori bilan tasdiqlangan “O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasi to‘g‘risida”gi Nizomga ko‘ra, Pensiya jamg‘armasining xarajatlari quyidagilardan iborat:

1. 
   Ishlamaydigan fuqarolarga davlat pensiyalarining barcha turlarini hamda qonun hujjatlariga muvofiq Pensiya jamg‘armasi mablag‘laridan moliyalashtiriladigan kompensatsiya to‘lovlari va boshqa to‘lovlarni to‘lash xarajatlari;
   
2. 
   Ishlaydigan fuqarolarga davlat pensiyalarining barcha turlari, dafn marosimi uchun nafaqalar, 16 yoshgacha bo‘lgan nogiron bolaning otaonalaridan biriga (vasiyga, homiyga) bir oyda qo‘shimcha dam olish kuni uchun to‘lovlar hamda qonun hujjatlariga muvofiq Pensiya jamg‘armasi mablag‘laridan moliyalashtiriladigan kompensatsiya to‘lovlari va boshqa to‘lovlar uchun xarajatlar.
   

O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasining moliyaviy ko‘rsatkichlari shuni ko‘rsatadiki, oxirgi 5 yilda Pensiya jamg‘armasi daromadlari 1,81 va xarajatlari 1,83 barobarga ortgan.
2017 yilda Pensiya jamg‘armasi daromadlari va xarajatlari o‘rtasidagi musbat qoldiq 1074,1 mlrd. so‘mni tashkil etgan. 2018 yilda esa Pensiya jamg‘armasining daromadlari 22,5 trln. so‘mni, xarajatlari esa 20,5 trln. so‘mni tashkil etgan bo‘lib, 2018 yilning oxirida Pensiya jamg‘armasi hisobidagi mablag‘lar qoldig‘i 5,4 trln. so‘mni tashkil qildi. Pensiya jamg‘armasi xarajatlari tarkibida asosiy ulushni yoshga doir pensiyalarni moliyalashtirish egallaydi.