Pedagogika va Psixalogiya

1-bob bo`yicha xulosa
Xulosa qilib shuni ta’kidlash lozimki, farzand tarbiyasi jamiyat taraqqiyotining muhim omili bo`lib, farzand tarbiyasida jamiyat va oila maqsadining uyg`unligi, ota-onaning farzand tarbiyasidagi mas’uliyati va burchi muhim sanaladi. Oilada bolani muvaffaqiyatli tarbiyalash o`ziga xos xususiyatga ega bo`lib, bular oila an’analari, iqtisodiy-maishiy imkoniyatlarini bilib olish, sog`lom psixologik muhit yarata olish, oila mas’uliyati va vazifalarini jamiyat talablari bilan uyg`unlashtira olish, bo`lajak oilaning modelini yarata olish, uni boshqarish ko`nikma va malakalarini xosil qilishdan iboratdir.
Xalq pedagogikasi ana shunday boy, intellektual meros hamda tarbiya manbai bo`lib, har tomonlama kamol topgan jamiyat va oilada o`z mavqeiga ega bo`lgan shaxsni shakllantirishda asosiy bilimlar majmui bo`lib xizmat qiladi. SHuning uchun ham ota-onalarni xalq pedagogikasi, uning tarbiyaviy ta’siriga katta e’tibor qaratishlari lozim.
Xalq pedagogikasida, asosan, oila, bolalar tarbiyasi, ota-onalar burchi haqidagi tasavvurlar mujassamlashgan.
Xalqning oila va nikoh, sevgi va muhabbat, ota-ona va farzand haqidagi tasavvurlari uzoq-uzoqlarga borib taqaladi. Mazkur tasavvurlar o`zbek xalqining uzoq yillar davomida avloddan-avlodga o`tib, sinalgan, tajribada qo`llangan qoidalarida va xulq me’yorlarida o`z ifodasini topgan.
Ma’lumki, oila va oilaviy munosabatlar o`ta murakkab jarayon. Bunda oilaning bolalarga ta’sir etish yo`llari, metod va usullari, an’ana va urf-odatlari ifodalanganligi bilan asosiy vazifani bajargan. Shuningdek, oila bo`sh vaqtni tashkil etish, bolalarning o`qish va mehnatini amalga oshirishga doir tashkiliy vazifani, oila a’zolari o`rtasidagi o`zaro munosabatlarda ahloqiy me’yorlarni belgilovchi vazifalarni ham bajaradi. Bularning barchasi asta-sekin oila tarbiyasining bir butun tizimini yaratgan. Bu munosabatlar oilada uning ichki aloqalarini amalga oshirgan, ota-onaning tarbiyaviy vazifalarini aniqlagan, bolalarga ta’sir etish shart-sharoitlari yaratilgan bo`lib, ulardan unumli foydalanish, albatta bola tarbiyasida samarali natijalarni beradi.