“Педагогика” фанини ўқитиш бўйича ўқув-услубий мажмуа

Таълим соҳасидаги давлат сиёсатининг асосий тамойиллари. Мустақиллик йилларида Ўзбекистон Республикасида узлуксиз таълими тизимини такомиллаштириш устувор йўналиш сифатида эътироф этилди. Республиканинг “Таълим тўғрисида”ги Қонунида узлуксиз таълим тизимининг моҳияти, йўналишлари, таълим мазмуни, таълимнинг ҳуқуқий асослари батафсил очиб берилган.
Таълим ЎзР ижтимоий тараққиётида устувор соҳа деб эътироф қилинди. Таълим соҳасидаги давлат сиёсатининг асосий тамойиллари фуқароларнинг ижтимоий келиб чиқиши, ирқи, тили, эътиқоди, ижтимоий мавқеидан қатъий назар таълим олишда тенг ҳуқуққа эга эканликларини ифодалайди. Давлат таълимий сиёсатининг асосий тамойиллари қуйидагилар:


Давлат таълимий сиёсатининг асосий тамойиллари.


Таълим ва тарбияни инсонпарварлаштириш шахснинг ижодий қобилиятларини рўёбга чиқаришга имкон яратади. Шунингдек, таълим жараёнида унинг маънавий-ахлоқий эҳтиёжлари, хоҳиш-истаклари ва ҳизиқишларини ҳисобга олишни назарда тутади. Яъни, таълим-тарбия жараёни шахсни ҳар томонлама камол топишини таъминлашга йўналтирилади, унинг шахсига нисбатан ҳурмат билан ёндашилади.
Таълим ва тарбияни демократлаштириш таълим мазмунининг очиқлиги, ўқув материаллари, таълим шакл ва методларининг хилма-хиллиги, миллий-ҳудудий хусусиятларнинг инобатга олиниши, шунингдек, тарбия жараёнининг демократик ғояларга мувофик ташкил этилишини англатади. Тамойил мазмунига кўра ўқувчиларнинг хоҳишларига кўра дарс жадвалига қўшимча фанлар киритилади, юқори синфларда муайян фанлар чуқурлаштирилиб ўргатилади, факультатив машғулот ва тўгараклар ташкил этилади, дарсларнинг якка ва гуруҳли шаклда бўлишига эътибор қаратилади.
Таълимнинг узлуксизлиги ва изчиллиги узлуксиз таълим тизимининг барча босқичларида ўқитиш ўзаро алоқадорлик, боғлиқлик асосида йўлга қўйилишини ифодалайди. Умумий ўрта таълим мактабларининг ўқув дастурлари академик лицей ва касб-ҳунар коллежларининг, ўз навбатида уларнинг ўқув дастурлари олий ўқув юрти ўқув дастурлари билан мутаносибликда яратилиб, бири ўзидан аввалги босқичда ўзлаштирилган маълумотни бойитади ва ривожлантиради.