Педагогик конфлектология фанидан оралиқ назорати топшириқлари

Конфликт сигналлари
Конфликт сигналлари конфликтнинг тўла намоён бўлишидан олдин томонлар ўртасидаги одатдаги тўғри муносабатлар ўртасида келишмовчилик, инқироз, ўзаро тушунмаслик, ғайирлик, айрмакашлик вужудга келаётганлигини намоён этади. Конфликт сигналларига беэътиборлилик унинг келгусида ривожланиб кетиши учун асос бўлиб хизмат қилади. Шу боис, конфликт сигналларини билиш ва уларга эътиборли муносабат талаб қилинади. Конфликт сигналларига инқироз, томонлар орасидаги танглик, тушунмовчилик, инцидентлар, дискомфорт киради. Уларнинг мазмунини тушуниш, уларга нисбатан мутаносиб муносабат одатда конфликтнинг эрта англаниши, инқирознинг олди олиниши ва унинг ҳал этилиши учун асос бўлиб хизмат қилади.
Инқироз
Томонлар орасидаги маълум ижтимоий, иқтисодий, маънавий инқироз дарров билинади. Агар бирор киши ўзининг дўсти, ҳамкори, ёки таниши билан ўз муносабатларини бирданига ва сабабсиз узиб қўйса, у билан гаплашишидан ўзини сақласа, ҳафа бўлиб юрса, уни турли қарама-қарши фикрлар қийнаса, бу - конфликтдаги инқирознинг вужудга келганлигига ишорадир. Бу ҳолатлар инқироз, ёки ҳал этилмаган ўзига хос конфликт белгилари ҳисобланади. Шу билан бирга, бошқа томонга нисбатан ишлатилган зўравонлик, таҳдид, шантаж кабилар ҳам инқироз вазиятининг мавжудлигини кўрсатади. Жуда қаттиқ баҳс юритиш, баҳсда томонларнинг бир-бирини аямаслиги, ўзаро таҳдидларнинг қўлланилиши ҳам инқироз вазиятининг кўринишлари ҳисобланади. Инқирозни кўрсатувчи ёрқин белгилардан бири киши ўз эмоцияларини ушлаб тура олмаслиги, ўз эмоциялари ва хис-туйғуларига эрк бериши, сўкишиш, ёмон сўзлар ишлатиш, бировни таҳқирлаш кабилардир. Одам бу вазиятда ўз эмоциялари ичига кириб кетиб, ўз фикрларида қарши томонни “у ёки бу қилворишга” жазм ҳам қилади. Бу вазиятларда тезда инқирознинг мавжуд эканлиги тан олиш, ўзини эмоционал тинчлантириш, инқироз вазиятини вужудга келтирган сабабларни таҳлил қилиш, ўзини музокараларга ҳозирлаш, қарши томон билан тинч мулоқотга ўтиш даркор. Агар бу иш қилинмаса, ҳақиқатан ҳам кучли конфликт юзага келиши аниқ.