Баҳтли оила 1 Кириш

Никоҳнинг хосияти ва никоҳсизлик фалокати
Оиланинг пойдевори никоҳдир. Никоҳ ёлғиз инсонларгагина хос фазилат. 
Ҳайвонлар ўртасидаги жинсий муносабатда никоҳ бўлмаслиги маълум. Зеро, 
ҳайвонларнинг оила ва жамият қуришларига ҳожат йўқ. Ҳашаротлардан қушларгача, 
хонакилардан ваҳшийларгача, барча жонзотларда наслни давом эттириш тартиблари 
бўлсада, бу жараёнларни никоҳ билан қиёс қилиб бўлмайди. Қуш уя қуради, тухум 
қўяди, боласини катта қилиб учиради, лекин кейин уни танимайди. Бир қанча 
полапонлар келажакда ўзларининг оналари билан ҳам жуфтлашишлари мумкин 
(айримлари бундан мустасно). Аллоҳ Таолонинг ҳикматини қарангки, инсонларни 
турли-туман қилиб яратган. Фараз қилинг, агар одамлар ҳам ҳайвонлардай бир-
бирларига ўхшаган бўлганларида оила, никоҳ тартиблари бузилиб, жамият остин-устин 
бўлиб кетарди. 
7

---

Ҳақ таолонинг яна бир ҳикмати урғочи ҳайвонлардан фарқли ўлароқ, аёлларда 
бокираликнинг мавжудлигидир. Бокиралик соғлом оила қуришнинг шартларидан бири 
ҳисобланади. Бугунги кунда никоҳ ва бокираликка қарши кишилар инсонларга хос 
бўлган иккита хусусиятга, демакки, ҳам оилага, ҳам инсоний қадр-қийматга қарши 
чиқмоқдалар. Очиқроқ айтганда, ҳайвоний ҳаётни истамоқдалар.
Никоҳсиз яшаш кенг ёйилган жамиятларда оила, шунингдек, ижтимоий 
тартибларнинг қандай аянчли, фожеали эканлиги ҳеч кимга сир эмас. Баъзи ғарб 
давлатларида болаларнинг 40 фоизи, никоҳсиз алоқа натижасида дунёга келганлиги 
маълум. Уйланишни кулфат деб ҳисоблаб, ҳайвонлардай "эркин" яшаётган кишилар 
жамиятида моддий ва маънавий муаммолар кун сайин ортиб бормоқда. Яна турли хил 
бедаво касалликлар пайдо бўлмоқда. Бу фалокатни англаган баъзи ғарблик олимлар, 
мутахассислар оилани қувватлантириш, никоҳ билан фарзанд кўришни кучайтириш 
учун турли хил компаниялар тузишган.
Афсуски, кўпгина шарқ ўлкаларида оила хусусида ғарбнинг пушаймон бўлиб, тарк 
этётган сиёсатлари кузатилмоқда, айниқса, беҳаё фильмларни ишлаб чиқариш ва 
тарқатиш билан оила дарахтининг ўқилдизига болта урилмоқда, янги авлод вакиллари 
фаҳш ва бузуқ ишлар гирдобига тортилмоқда.