Gulyamov saidahror saidahmedovich raqamli iqtisodiyotda blokcheyn texnologiyalari

2-BOB. TA’LIM VA KADRLAR SALOHIYOTI RAQAMLI 
IQTISODIYOT RIVOJLANISHINING ASOSIY OMILLARI SIFATIDA 
Raqamli iqtisodiyotda inson faoliyatining asosiy sohalari samarali 
rivojlanishining muhim sharti – unga mos keluvchi institutsional muhit 
shakllantirish hisoblanadi. O‘zbekiston Respublikasi raqamli iqtisodiyotni 
rivojlantirish Dasturida kadrlar va ta’lim tizimi raqamli iqtisodiyotni rivojlantirish 
uchun sharoitlar yaratiladigan asosiy institutlar qatoriga kiritilishi va unga alohida 
bo‘lim bag‘ishlanishi kerak. Dasturda kadrlar va ta’lim bilan bog‘liq quyidagi 
asosiy yo‘nalishlar belgilab berilishi lozim deb o’ylaymiz: 

raqamli iqtisodiyot kadrlari tayyorlash uchun sharoitlar yaratish; 

raqamli iqtisodiyotni chuqur bilimga ega kadrlar bilan ta’minlashi lozim 
bo‘lgan ta’lim tizimini yanada takomillashtirish; 

raqamli iqtisodiyot uchun kerakli bo’lgan oliy malakali mutaxassislarni o’rta 
va oliy ta’lim muassasalarida tayyorlashni yo’lga qo’yish; 

raqamli iqtisodiyot uchun kerakli bo’lgan o’zbek tilidagi zamonaviy ilmiy va 
amaliy adabiyotlar yaratishni ko’zda turish; 

raqamli iqtisodiyot talablariga tayanishi lozim bo‘lgan mehnat bozorini 
tashkil qilish mexanizmlarini ishlab chiqish; 

zarur chuqur bilimga ega bo‘lgan dasturchilar va texnik xodimlarni 
tayyorlashni yo’lga qo’yish; 

kadrlarning O‘zbekiston raqamli iqtisodiyotni rivojlantirishdagi ishtirokini 
moliyalashtirish va motivatsiyalash tizimini yaratish. 
Ta’lim tizimi mehnat bozorning hozirgi holatiga ham, uning raqamli 
texnologiyalar joriy qilinishi bilan bog‘liq o‘zgarishiga ham yo‘naltirilishi lozim 
ekanligini hisobga olib, kadrlar bilan bog‘liq muammolarni har bir kadrlar 
salohiyatining raqamli iqtisodiyotdagi o‘rnini ko‘rib chiqishdan, shuningdek, 
mehnat bozorini tahlil qilishdan boshlaymiz.