Microsoft Word Tursunboyev S. O'zbek teatri tarixi. Majmua

  
«NURXON» SPEKTAKLI 
Asar  dastlab  1942-yili  sahnalashtirilgan.  Rejissorlar:  A. Azimov,  I. Donatov;  bosh 
rollarda  o’ynaganlar:  Sh. Rahimova,  T. Ja’farova,  keyinroq,  E. Jalilova,  F. Rahmatova 
(Nurxon)  M. G’ofurov,  A. Abdurahmonov  (Haydar),  L. Sarimsoqova  (Kimyo),  A. Azimov, 
A. Ismatov, A. Yusupov (Hoji) kabilar. 
 
 
«NURXON» SPEKTAKLI HAQIDA M.QODIROV SHARHI 
Postanovkachi  rejissor  Razzoq  Hamroyev  barcha  komponentlar  —  so’z,  muzika, 
tasvir, raqsni bir-birini uzviy bog’lashga, obrazlarni murakkabroq talqin etishga intildi. 
Yaqinda  esa  «Nurxon»  muzikali  dramasining  yana  bir  postanovkasini  ko’rdik... 
Nurxon  rolida  yosh  aktrisa  Naima  Ishoqova  (Po’latova  —  S. T.)  chiqdi.  U  dastlabki 
sahnadayoq  qahramonini  beg’ubor  latofat,  mehr-muhabbatga  limmo-lim,  odob  va  hayo 
mahbubi  qilib  gavdalantiradi.  Eng  muhimi  shundaki,  aktrisa  Nurxon  obrazini  yaratishda 
o’zidan  oldin  mavjud  bo’lgan  muhabbatni  tantanavor  yoxud  melodramatik  ruhda  tasvir 
etuvchi  uslubdan  voz  kechib,  hayotiy  oddiy  vositalardan  foydalanishni  ma’qul  ko’rgan. 
Ikkinchi tomondan,  ijrochi Nurxon  rolidagi so’z bilan  vokal qismlarining bir-biriga  uzviy, 
organik  bog’lanib  ketishi  ustida  ham  xiyla  bosh  qotirgan  ko’rinadi.  Bu,  o’z  navbatida, 
teatrning  bosh  rejissori  Razzoq  Hamroyevning  yoshlar  bilan  jiddiy  ish  boshlaganidan 
dalolat beradi... 
Lutfixonim Sarimsoqova yaratgan Kimyoda o’zbek ayollarining eng yaxshi fazilatlari 
mujassamlashgan.  Uning  ko’zlaridan  nur,  tilidan  bol  tomib  turadi.  Ochiq  ko’ngil,  mehr-u 
vafoli,  serandisha.  Umri  Hojining  qo’lida  jabr-u  sitam,  azob-uqubat-la  o’tgan  bo’lsa-da, 
mana  shu  fazilatlarini  yo’qotmagan  va  yaxshi  kunlarga  umid  bilan  yashagan  Kimyo  — 
Sarimsoqovaning  sabr-bardoshiga  qoyil  qolasan,  kishi.  Aktrisa  o’z  qahramonining, 
xususan,  qizi  Nurxonga  bo’lgan  ulkan  onalik  mehrini  tomoshabinlarni  bag’oyat 
ta’sirlantiradigan,  o’rni-o’rni  bilan  esa  larzaga  soladigan  darajada  ifoda  etadi.  Boshqacha 
aytganda, L. Sarimsoqova bu gal obraz dramatizmini yanada kuchaytirdi.