Кичик гуруҳ (3-4 ёш)

Миқдор, катталик. Болага буюмларни (5 тагача) катта-кичиклиги, 
кенг-торлиги, узун-калталиги, баланд-пастлигига кўра бир-бирининг 
устига қўйиб қиёслашни, ортиб ва камайиб борадиган тартибда қўйиб 
қиёслашни машқ қилдириш (энг кенг, тор, торроқ, янада торроқ, энг тор 
тасма). 
Нарсаларнинг қалин-юпқалигини қиёслаш, “қалин”, “қалинроқ”, 
“юпқа”, “юпқароқ”, “бир хил” сўзларини нутқда тўғри қўллашни ўргатиш.
Геометрик шакллар. Доира, квадрат, учбурчак шаклларини бир-
биридан фарқлашни мустаҳкамлаш. 
Тўғри тўртбурчак шакли билан таништириш, тўғри тўртбурчак ва 
квадратни фарқлашни, номини айтишни, уларни сезиш – ҳаракат ва кўриш 
усуллари орқали ўргатиш. 
Овал шакли билан таништириш, доира ва овални фарқлашни, номини 
айтишни, уларни сезиш – ҳаракат ва кўриш усуллари орқали ўргатиш. 
Куб, шар, цилиндр каби шаклларнинг номини айтиш ва бир-биридан 
фарқлаш. 
Шакллар ҳар хил ўлчамда бўлиши мумкинлиги ҳақида тасаввур ҳосил 
қилиш (катта доира – кичик доира, катта квадрат – кичик квадрат). 
Таёқчалардан тўғри тўртбурчак, квадрат, учбурчак ясашга, бу 
шакллардан фойдаланиб турли нарсалар ясашни машқ қилиш. 
Болага буюмларни кузатиш, уларнинг жойлашуви, белгилари, 
ўлчамларига эътибор қаратиш имкониятини бериш, буюмларнинг ўлчами, 
шакли ва рангини солиштириш ҳамда улар ўртасидаги тафовутлар 
тўғрисида сўзлаб беришга ўргатиш.
Фазода мўлжал олиш. Нарсаларни ўнг қўл билан чапдан ўнгга 
қараб териш кўникмасини мустаҳкамлаш. 
Болага буюмларнинг жойлашган ўрни ҳақида саволлар билан 
мурожаат қилиш, у ёки бу буюмнинг ўзига нисбатан жойлашувини сўз 
билан ифодалашни (олдимда – стол, орқамда – шкаф, пастда – пол, 
юқорида – шип, ўнг томонимда – дераза, чап томонимда – эшик, шкаф – 
узоқда, стул – яқинда), берилган йўналишда (олдинга-орқага, ўнгга-чапга) 
ҳаракат қилишни ўргатиш.